Generalitat e Conselh Generau acòrden finançar inversions ena Val d'Aran
Eth conselhèr d'Economia e Finances, Francesc Homs, e eth síndic d'Aran, Carlos Barrera, an signat un acòrd de collaboracion entre er Institut Catalan de Finances (ICF) e eth Conselh Generau d'Aran entà finançar es projèctes d'inversion en infraestructures e equipaments ena Val d'Aran. Er acòrd a era finalitat de promòir esturments de cooperacion financera entà facilitar es inversions tant deth Conselh Generau d'Aran coma des organismes autònoms e des empreses publiques.
1 min
Era Generalitat e eth Conselh Generau d'Aran an signat un convèni entà finançar inversion en infraestructures e equipaments ena Val d'Aran. Er ICF daurirà ua linha de finançament de sies milions d'èuros en forma de crèdits ventatjosi. Atau, se poderà finançar enquia eth 100% dera inversion prevista, tamb un tèrme que pòt arribar as trenta ans, tamb dus de caréncia. Entà esturmentar de forma mès rapida e eficaç es operacions que gesquen d'aguest conveni, eth Conselh Generau d'Aran e er ICF establiran canaus de comunicación constant entà intercambiar informacion. Eth govèrn aranés se compromet a facilitar documentacion actualizada relatiua as projectes que s'an de finançar. Pera sua part, er ICF informarà periòdicament ath Conselh des prèsti formalizadi. Pendent er acte de signatura, eth síndic a comentat qu'eth prumèr projecte qu'eth Conselh Generau d'Aran finançarà a trauèrs d'aguesta linha de crèdit ei eth bastiment d'ua residéncia entà persones discapacitades en Vielha.
