Marc Ubeira Cierco: Objectius e rèptes deth joen esquiador aranés integrat ena RFEDI
Aguesta fin de setmana se dispute ena estacion de Baqueira Beret era corsa Amics de Montgarri qu'organize eth Club Aranés d'Espòrts d'Iuèrn, CAEI.
Damb era se daurís ua naua edicion dera Audi Quattro Cup, eth circuit de corses d'esqui aupin de referéncia dera piramida esportiua enes categoríes U10/U12.
Calendari
Eth calendari dera Audi quattro Cup ena18au edicion s'alongarà enquiath mes d'abriu en sies sedences.
Dempús dera cita aranesa era competicion se desplaçarà enquia Castelha e Leon, concrètaments enquiath complèxe de San Isidro, a on eth 24 de gèr se disputaràn es campeonats autonomics.
Aragon acuelherà era tresau fasa aguesta Audi quattro Cup (AqC) damb era celebracion deth Trofèu Candanchú, en aguest madeish espaci eth 7 de hereuèr.
Era quatau arturada sera ena Molina damb eth 28º Pista! Pista! eth 28 de hereuèr; en març seguirà era accion damb eth XXIX Trofèu Pitarroy, en Cerler, deth 7 ath 8 de març.
Fin finau, eth circuit se barrarà en Sierra Nevada, damb eth VII Trofèg White Camps - Campeonat d'Andalosia, deth 3 ath 4 d'abriu.
Eth president de RFEDI, May Peus España, explique que:
Era Audi quattro Cup ei eth circuit de referéncia der esquí aupin de base. D'aguesta competicion an gessut es esportistes que ara mos representen ath mès naut nivèu com Aleix Aubert (LMCE-FCEH), que competís ena Copa deth Mon, a on a artenhut resultats istorics entà España o Quim Salarich, (LMCE-FCEH), gran referéncia der esqui aupin espanhòl que artenhie aguesta setmana un top 13 ena Copa deth mon disputada en Madona de Campiglio
Eth futur ja ei present
Qui tanben a passat per aguesta competicion ei Marc Ubeira Cierco. Er esquiador, de 19 ans e neishut en Vielha, comencèc tard en mon der esqui, mès era evolucion a estat tan plan bona que lo an portat a hèr part enguan dera equipa C d'esqui aupin ena Real Federación Española de Deportes de Invierno, RFEDI.
Especialista en eslàlom e gegant, damb eth Club Aranés d'Espòrts d'Iuèrn (CAEI), a disputat es competicions mès destacades deth calendari estatau en totes es categories, entà dempús entrar en Centre de Tecnificacion d'Espòrts d'Iuèrn, CETEI, dera Val d'Aran e hèr part dera equipa de tecnificacion dera Federació Catalana d'Esports d'Hivern.
Resultats destacadi
Aguesta sason a començat tan plan ben entar esquiador de Vielha. En VI Trofèg FIS Blanca Fernández Ochoa, que se disputaue en Baqueira Beret, Marc Ubeira guanhaue era pròva d'eslàlom. Dies mès tard tornaue a guanhar en Espot e dempús en Soldeu, en Andòrra, un quatu lòc li permetie baishar des 30 punts FIS.
Objectius
Eth prumèr qu'ei poder córrer ena Copa d'Euròpa masculina d'eslàlom que s'harà en Baqueira Beret e eth dusau arténher ua plaça ena equipa espanhòla entath Mondiau Junior que se disputarà en març en Norvègia. A mès long tèrme arribar ena Copa deth Mon e perqué non, poder disputar uns Jòcs Olimpics.
