Meddia aranés, de Catalunya Radio, complís 15 ans

Diariament, es 365 dies der an, eth magazin meddia aranés, arribe en totes es cases d'Aran de 12 a 1 de meddia e de 7 a 8 dera vrespada, entà aufrir era informacion sus es ahèrs deth parçan, entrevistes, spòrts, cultura, cine, previsions meteorologiques o era agenda. Ath long des ans, s'an hèt apartats damb tematiques ben diuèrses: codina, sanitat, istòria, lengua e literatura, e s'an incorporat d'autes seccions, com es tertulies o eth resum. Pendent 15 ans, son fòrça es tèmes tractats e es personatges entrevistats. Meddia Aranés a estat testimòni de notícies importantes que an mercat era vida vidanta deth parçan e a estat eth forum diadèr de debat de idees, e un junhent important damb era societat dera Val, damb prepauses com "Me condes un conde", que a apropat era radio as escòles. Entà conmemorar eth 15au aniversari deth programa aranés, Catalunya Radio vò refortilhar eth sòn compromís damb era promocion e desvolopament dera lengua e cultura aranesa, e per aquerò aguesta vrespada en Arròs, eth director generau dera Corporacion Catalana de Radio e Television, Vicenç Villatoro, e eth director de Catalunya Radio, Eugeni Cabanes, haràn entrega ath Conselh Generau der archiu sonòr des 15 ans de Meddia Aranés, que comprén es resums setmanaus des programes emetudi des der an 1991 e es programes especiaus mès subergessenti. Eth Conselh Generau e Catalunya Radio firmaràn tanben un convèni de collaboracion entara digitalizacion de aguest hons documentau. Aguest serà eth prumèr acte oficiau damb eth que Catalunya Radio encetarà es celebracions deth sòn 20au aniversari.