Me'n condes un de sciéncia?
" Me'n condes un de sciéncia"?
Ei eth concors de relats cuerts qu' impulse er Institut de Sciéncies dera Educacion dera Universitat de Lleida .
Aguest certamen que ja arribe ara dotzaua edicion a com objectiu evidenciar eth besonh d' un bon usatge dera expression escrita en toti es airaus deth "curriculum" academic, com ac remèrque Noelia Costa, cap deth departament de sciéncies der Institut d'Aran
Es mainatges e mainades non sonque an de saber de sciéncies, senon que tanben an de saber redactar, expressar e compréner tot çò que liegen de sciéncies e de d'auti ahèrs
Er Institut d'Aran i a presentat enguan un quinzenat de trebalhs des alumnes de 3au e 4au cors dera ESO.
En aguesta categoria, eth tèma ei liure , sonque cau que en sòn escrit i siguen presents quauqui des tèmes escuelhudi dera darrèra edicion dera Setmana dera Sciéncia que enguan se hec en mes de noveme.
Pòden èster autant relats novel.ladi, ua explicacion, o sciéncia-ficcion... Aquerò non ac tien tant en compde com er hèt dera qualitat dera redaccion e era originalitat
Deth totau des 64 relats d'un detzeat de centres de primària e segondària des comarques de Ponent , de l'Alt Pirineu e Aran e d'Igualada, que s'an presentat en aguesta edicion, es de dues alumnes d'ací an guanhat eth prumèr prèmi.
En catalan, era guanhadora ei Ares Barba Jiménez, damb eth relat "DINS LA CAIXA".
En sòn escrit adapte er experiment mentau o paradòxa que hec a servir eth fisic austriac Schrödinger , damb un gat embarrat en ua caisha , entà explicar de forma planèra e senzilha era mecanica quantica.
Ei ua istòria , ena qu' as de saber un shinhau de fisica quantica entà poder-la compréner, perque senon te quedes damb eth conde...Ei fòrça mès interessanta quan la entenes
E en aranés , eth prumèr prèmi siguec entà Sofia Cortés Portolà, que escuelhec eth tèma dera conservacion des glacièrs.
S' inspirèc ena Maladeta , entà escríuer eth sòn relat " ETH DARRÈR GLACIÈR".
Des de petita e entenut a parlar deth glacièr dera Maladeta e è sabut fòrça causes. E entà hèr eth mèn relat, è connectat aguesti coneishements damb d'auti tèmes e estudis sus es glacièrs e ac è relacionat tanben damb un hèt fòrça interessant, que siguec eth descorbiment d'ÖTZI, eth còs trapat en un glacièr , que a permetut as investigadors obtíer fòrça informacion deth passat
Es prèmis : era publicacion des relats ena web dera Universitat de Lleida, e materiau e libres de sciéncies entàs guanhadores e er Institut.
