Professors que demoren en otèls o en campings pera manca d'abitatge en Aran

Sense opcions tà establir-se en territòri pera manca d'abitatge e peth naut còst dera vida. Son es condicions que denóncien professors der Institut d'Aran e que se somen, asseguren, ara pèrta de poder adquisitiu e ar empejorament progressiu des condicions educatives que se da en tota Catalonha. Ara, an impulsat ua assemblada entà canalizar es sues reivindicacions.

Professors que demoren en càmpings o en otèls
 

Sergi Pruna a arribat aguest cors en Institut d'Aran entà hèr de professor de plastica. Non li adjudiquèren era plaça enquiath 29 d'agost e auie de començar a trabalhar ath dia següent. Era unica opcion que trobèc iniciauments siguec demorar en un camping: 

"Es mies dues prumères setmanes de classa sigueren en tot víuer en un camping. Trapè un apartament petit per 900 euros mesadèrs. Totun, me dideren qu'a compdar d'octobre eth loguèr pujarie a 2.500 èuros mensuaus"

Fin finau, Sergi marchèc a víuer ena Nauta Ribagòrça. Mès ací era soleta opcion que trapèc siguec un loguèr enquiath 30 de junh. "Non me pògui empadronar, pr'amor que non ei un loguèr de longa durada", ahig.  

Sense possibilitats d'arraïtzar-se

Mès eth de Sergi non ei cap un cas isolat. Es professors der Institut d'Aran denoncien qu'enes darrèri ans, an estat fòrça es companhs vengudi de dehòra qu'an marchat pera impossibilitat d'auer un abitatge digne a prètz assequible.

"Trapam molti exemples de companhs que dilhèu an pensat que ja non s'ac valie d'èster aciu e an cercat d'auti lòcs damb mès facilitats d'abitatge", explique Raül Navarro, professor de geologia e biologia en Vielha. "Tanben mos trapam damb situacions de bèth professor que demore en otèl e que quan arribe era nauta sason, an d'abandonar eth lotjament pr'amor qu'eth prètz dera abitacion creish".

A tot açò, cau híger era pèrta de poder adquisitiu hijut a un còst dera vida superior ara mejana catalana. "Arribe professorat qu'a volontat d'arraïtzar-se, li agrade era naturalesa e víuer en aguest entorn privilejat, mès lo pagam a un còst molt naut. Dempús d'un o dus ans acaben en tot marchar cercant espais a on realment se poguen independizar", apunte, deth sòn costat, Rosanna Sellart, psicopedagòga en Institut d'Aran.

Assemblada pròpria

Arraïc dera darrèra mobilizacion deth professorat en Barcelona entà reclamar milhores laboraus, aguest grop de professors der Institut d'Aran an creat ua assemblada pròpia entà denonciar es condicions especifiques que patissen es docents per hèt de víuer ací.