Teatròlha, un nau grop de teatre en aranés
Un nau grop teatrau en aranés a començat a caminar en terçon dera Irissa, en Es Bòrdes. Lo formen, sustot, nauvengudi que, gràcies ad açò, ara tanben aprenen era lengua. Damb aguest, ja son 4 es grops que hèn teatre en aranés ena Val d'Aran.
Son es Teatròlha, un nòm que hè referéncia a un plat tan plan representatiu dera gastronomia aranesa, coma ei era òlha e que, en cèrta manèra, tanben definís era identitat d'aguest grop format per gent venguda d'ací e delà e que vòlen arraïtzar-se en tot apréner era lengua. Rocío Azabal n'ei era directora e, segontes explique, era idèa de crear un grop de teatre neishec ena escòla 'Casteth Leon' de Es Bòrdes, a on era exercís coma auxiliar de convèrsa: "Tot sorgic en ua convèrsa damb dues des mies companhes, en tot parlar sus es talents qu'auíem de hèr treatre".
S'estreen aguest dimenge 22 de hereuèr representant "Eth congelador", un classic deth teatre gascon, que ja se representèc hè lèu vint-e-cint ans per part de Lengua Viua e tanben per part deth grop de mainatges e mainades de Es Bòrdes. "Ei ua òbra tà arrir, segur que eth public s'ac passarà fòrça ben", comente Azabal.
Ua forma d'apréner era lengua
Un des actors deth grop ei Eduardo Martínez, qui arreconeish que se non siguesse perqué a memorizat eth sòn papèr non poirie parlar en aranés: "A jo me còste un pialèr parlar-lo ena vida vidanta. Sò coma aqueri actors que an d'apréner tot eth papèr de memòria, mès ei ua oportunitat de forçar-me a parlar". "Eth teatre mos da era oportunitat d'apréner a toti aqueri que non parlam er aranés abituaument", ahig Azabal.
Nèish un nau grop de teatre en aranés en Es Bòrdes
Miquèu Segalàs, professor de lengua -e un veteran deth teatre damb es representacions de Lengua Viua- ei er unic membre deth grop qu'a er aranés coma lengua abituau e ajude as sòns companhs damb tot çò que pòt:
toti eri an era volontat fèrma de calar-se entà apréner e començar per aguesta òbra de teatre. Aquiu, per fòrça l'an d'apréner, l'an de memorizar e l'an de parlar
Es Teatròlha se somen a d'auti grops dera Val d'Aran que tanben hèn, un còp ar an, òbres en aranés. Son Era Cabana de Les (un istoric), eth collectiu Lengua Viua -qu'a recuperat es sues representacions dempús d'ans sense hèr-ne- o es mèstres dera escòla Garona de Vielha, que, d'ençà de hè dus ans, tanben s'an somat ath fenomèn.
Es representacions de 'Eth congelador' se haràn aguest dimenge 22 de hereuèr ena Sala Sociau de Es Bòrdes (dessús der Ajuntament). Era prumèra session serà tàs 18:00 ores e era dusau tàs 19:30. Toti aqueri que i volguen anar an de reservar era entrada ena Oficina de Torisme de Vielha. Totun, es vesins de Es Bòrdes i pòden anar directament. Es entrades son gratuïtes, mès ena entrada i aurà ua dineròla entà aportar era volontat.
