Tres naues rotes toristiques descorbissen er Aran mens visitat

Eth papèr des hemnes ena vida rurau, era fauna sauvatja e era istòria medievau son es protagonistes des tres naues rotes toristiques estreades aguesti dies en Vilamòs, Bossòst e Les. Se tracte de tres pòbles damb servicis e ben comunicadi. Totun, son des mèns visitadi en Aran e, per aquerò, çò que se cèrque damb aguesta iniciatiua ei hèr espongiua era afluéncia de visitants e atrèir eth torisme familhar entad aguesti pòbles. 

Segons eth conselhèr de Tortisme deth Govèrn aranés, Josep Canut, er objectiu non ei un aute que "diversificar". "Auem punts estrategics e damb atractiu, mès que non auien cap de renòm. Ara, volem potenciar-les e damb aquerò, ampliar era nòsta auferta", afirme.

Es tres naues rotes explicatiues son hètes a compdar de pannèus informatius e figures d'acer Corten. Se placen en entorn semiurbans o de natura. "Es desnivèus son plan assequibles entà toti es public".

"Son rotes cuertes e pensades entà apropar ua part de la nòsta istòria, cultura e patrimoni as familhes que mos visiten",

soslinhe Marisol Ariño, gerenta deth Plan de Sostenibilitat Toristica d'Aran. 

'Eres', eth papèr des hemnes

Aguesta rota, dedicada as oficis tradicionaus des hemnes en entorn rurau, se place en Vilamòs. 

Eth recorrut propòse ua visita peth casc antic e es entorns deth pòble, enquiara ermita de Sant Miquèu, a trauès de supòrts explicatius e elements visuaus, un totau de ueit, que meten de relèu es oficis e ròtles tradicionaus femenins ena societat aranesa en d'auti tempsi.

Ei ua rota que, segons era gerenta deth Plan de Sostenibilitat Toristica dera Val d'Aran, Marisol Ariño, "se complemente" damb era visita a Çò de Joanchiquet, ua casa tradicionau aranesa reconvertida en Ecomusèu e que forme part der hilat de Musèus dera Val d'Aran.

Aran sauvatge 

Eth shivau pirenenc catalan, era marmòta, er isard, eth paüm, eth gahús pirenenc, era agla daurada, eth triton e er os son es protagonistes d'aguest recorregut plaçat en Bossòst. Son bèri uns des animaus mès emblematics d'aguest parçan deth Pirenèu.  Cada punt te desvelhe curiositats, abitudes e er abitat d'aguestes espècies. 

Era rota ges de Bossòst e auance entath Barranc de Margalida, a trauèrs deth bòsc e vò èster tanben un complement de ua auta prepausa restacada ara fauna e plaçada en aguest pòble deth Baish Aran, Aran Park, un espaci zoologic a un abiten fòrça d'aguestes espécies. 

Castèth de Les

Damb eth Castèth de Pijoèrt coma element omnipresent, cada punt d'aguest camin revèle un capitol dera istòria medievau de Les. Era arqueologia der entorn e era documentacion meten en relèu eth sòn passat estrategic e singular ena Val d'Aran. 

Aguest ei un recorregut en qué i trapam referéncies ara espasa de hèr deth sègle XV qu'apareishec enes catacions arqueologiques que se heren en castèth enes ans 90 deth segle passat. Mès tanben met en valor es tradicions, coma es hèstes deth huec -damb er Haro coma element centrau- o eth papèr geoestrategic dera Val d'Aran pendent era Edat Mieja. 

Era rota comènce enes Tèrmes dera Baronia de Les, entre en centre deth pòble pera plaça der Haro e acabe ena ermita de Sant Blai. Aqueri que se trapen en forma, pòden alongar era visita enquiath castèth de Pijoèrt.

Aguest projècte ei includit en Plan de Sostenibilitat tath Foment deth Torisme deth Conselh Generau d'Aran. Es tres rotes an estat inaugurades aguest mès d'agost coincidint damb eth punt maxim de visites dera sason d'ostiu.