Ua vielha casèrna dera Guàrdia Civil servirà d'accès ath nau centre de fauna d'Aran
Era vielha casèrna dera Guàrdia Civil dett Pòrt deth Portilhon se convertirà ena recepcion deth nau centre de fauna sauvatge que se projècte en airau deth Baish Aran. Segontes an informat hònts deth Conselh Generau d'Aran, es òbres d'adequacion e reabilitacion dera vielha casèrna s'iniciaràn ena primauèra, ath madeish temps que es trabalhs entara metuda en marcha deth parc.
1 min
Era vielha casèrna dera Guàrdia Civil, plaçada fòrça apròp dera frontèra tamb França, serà "eth centre de recepcion des visitants en parc", on se les facilitarà informacion mediambientau sus era flòra e era fauna der airau e des d'a on se començarà era rota. Just ath torn d'aquest equipament, e un airau de 30 ectars, se plaçarà eth parc de visualizacion de fauna e flòra tipica d'Aran. Era intencion deth Conselh Generau d'Aran ei adequar aguest airau tamb un barralh perimetrau e un circuit a pè entath visitant, entà qu'aguest pogue observar era flòra autòctona, concretament era vegetacion e diferents animaus pròpis dera airau. Atau, en aguest espaci poderàn contemplar-se cèrvis, isards, sanglièrs, cabiròs, diferents aus rapinaires e plan tanben bèth exemplar d'os brun.
