Un laueg s'empòrte era vida d'un joen vesin de Les
Es Pompièrs d'Aran barrauen aguest deluns eth dispositiu de rescat ena zòna a on dimenge i auec un laueg damb un esquiaire mòrt. Se tracte deth prumèr accident de montanha grèu d'aguesta sason d'iuèrn en casa nòsta, en un dimenge nere en qué tanben moric ua auta persona mentre esquiaue dehòra de pista en Cerler, ena Val de Benàs.
En aguest iuèrn qualificat pes expèrts coma "atípic" pes temporaus de nhèu constants, eth Pirenèu a registrat dejà 6 mòrts per lauèg, 5 d'eri en Aragon. Se tracte d'ua tragica circonstància que non s'a dat enes darrèri 30 ans.
Et alit d'aguest dimenge ena Val d'Aran auec lòc en barranc de Laueja, ena cara nòrd deth Dossau, ua zòna dehòra de pista de Baqueira-Beret relativaments soentejada per esquiaires expèrts.
Tath torn des 4 e mieja dera tarde, un guida de montanha daue er avís as servicis d'emergéncia. Aquera madeisha vrespada, membres deth Grop de Rescat de Montanha des Pompièrs d'Aran e d'era equipa de seguretat de Baqueira-Beret localizauen ua victima damb parada cardiorespiratòria. Pòc dempús es servicis sanitaris desplaçats ena zòna ne certificauen era sua mòrt. Se tracte d'un joen de 29 ans, vesin de Les, qu'auie gessut solet entà practicar esquí de montanha.
Totun, era trobalha d'un dusau equip d'esquís ena madeisha zòna hec a dobtar as equipes de rescat. Coma explicaue Jordi Lòpez cap der operatiu de rescat des Pompièrs d'Aran,
"siguec ua sorpresa. Ère un esquí diferent ath que portaue era victima, per aquerò mos hec a pensar que poirie auer ua auta persona atrapada"
Totun, aguesta ipotèsi demorèc escartada posteriorament, quan se comprovèc -pera etiqueta der esquí- que se loguèc est'an passat en ua botiga de loguèr d'esquís e lo dèren per perdut.
Un còp comprovat, tanben, que es tralhes d'esquís que se visualizaven ath cant deth laueg èren d'abans deth alit, eth dispositiu de recerca se barraue deluns ena tarde.
Un iuèrn complèxe e atipic
Eth laueg mortau en barranc de Laveja a ua longada de 200 mètres, mès sonque s'arribèc a despréner ua quatau part de tota era pala. "Ei un exemple d'aguest problèma de coches fèbles persistentes", apunte Sara Orgué, tecnica deth Centre de Lauegi dera Val d'Aran.
Segontes apunte, "tota era nhèu queiguda abans de Reis presente ua baisha coesion. Ath dessús auem era nhèu des darrères nheuades mès coesionada. Aguesta combinacion ei plan desfaborabla. E se poden desencadiar lauegi potenciaument perilhosi peth pas d'esquiadors".
Segons apunten es expèrts, mos trobam deuant un iuèrn atipic en çò que tanh a precipitacions. Coma explique Pere Esteban, tecnic deth Servici Metereologic de Catalonha e coordinador de meteomuntanya.cat, "iuèrn ei era sason ena qué, normaument, mèns precipite en Pirenèu. Totun, enguan mos trobam que en ua part dera sarrada, especiaument ena part Orientau, aguesta seqüéncia de nheuades a hèt a superar es celhs de nhèu que tocarie per aguesta epòca".
Per tot aquerò, se recomane extremar era precaucion aguesti dies ara ora de hèr activitats de montanha.