Aran vò aplicar eth dret civil aranés a toti es matrimònis que se formalizen ena Val
Eth Conselh Generau d'Aran proposarà era inclusion deth dret civil aranés a toti es matrimònis que se formalizen ena Val, que actuauments son reguladi perth còdi catalan. Concretaments, se tracte dera mieja guadanheria, que establís eth repartiment ath 50% des guanhs que conseguissen es parelhes dempús dera formalizacion deth matrimòni. Era compilacion deth dret civil catalan ja recuelh era convenença a mieja guadanheria e autes aspectes deth dret civil aranés, coma ara era torneria. Non obstant, per tal qu'aguesta figura sigue efectiva, es matrimònis ac an de demanar de forma explicita.
1 min
Er objectiu deth Conselh Generau d'Aran ei arténher qu'era mieja guadanheria se convertisque en dret supletòri, hèt que le convertiria directament en regulador de toti es matrimònis que se formalizèssen ena Val d'Aran. Era propòsta d'aplicar era mieja guadanheria a gessut deth Departament de Cultura deth Conselh Generau, tot e qu'encara s'an d'estudiar es formules entà hèr efectiua era demanda. Era iniciatiua encara auria de recéber eth vist-e-platz dera maxima institucion aranesa e dempús passar as administracions competentes ena regulacion de dret civil. Eth Departament de Justícia dera Generalitat ja coneish era propòsta deth Conselh Generau, que en es pròplèus mesi se vò concretar entà arténher recuperar eth dret civil aranés e adaptar-le ara societat actuau.
