Baqueira Beret daurís era sason de competicions damb dus events internacionaus

Baqueira Beret ven de daurir era sason de competicions d'esqui.

Ena dimenjada deth 20 e 21 de deseme, era estacion aranesa acuelhie ath temps eth Trofèu CAEI-Naut Aran d'esqui de hons e eth Trofèu FIS Blanca Fernández Ochoa d'esqui aupin.

En circuit de hons deth plan de Beret se hèren dues jornades de competicion en estil liure. Ua cita que servic tà estrear era Copa Pirenèus d'esqui de hons. Ua competicion que promò era RFEDI tà esportistes d'Espanha, França e Andòrra damb er objectiu d'impulsar es espòrts d'iuèrn entre es joeni esportistes des categories U14/U16.

Ena prumèra edicion s'amassèren mès de 300 esportistes de totes es categories enes dus dies de competicion, dissabte damb er esprint e dimenge damb era pròva de distància, totes dues en tecnica liura.

Victòria tà Espanha

Ath delà des prèmis deth Trofèu CAEI - Naut Aran ena competicion individuau, era Copa Pirenèus balhe eth prèmi ara equipa que some mès punts sonque damb es esportistes des categories U14 e U16.

Era Iª Copa Pirenèus d'esqui de hons finalizaue damb era victòria entar equip espanhòl damb 2231punts, pes 2019 dera equipa francesa e 419 entàs andorrans. Ena equipa espanhòla subergesssien era corredora locau Fiona de Castellarnau (CAEI-FCEH), Álvaro Gimeno (ASPE-FArgDI) e Iradi Elvira (IRRTZ-FNDI). En França, Suzon Begny e Martin Lanne e per Andòrra, Joana Escriba.

Valoracions molt positiues

Haritz Pascual, membre deth comitat organizador per part dera RFEDI ena Copa Pirenèus n'hège un bon balanç: "Er objectiu ei júnher as esportistes des 3 païsi, Espanha, França e Andòrra. Demoram qu'enes pròplèus ans contunhe de créisher aguesta Copa e que servisque tà que toti eri se motiven tà participar. Er an que ven li tocarà en França acuélher aguest eveniment".

Ath sòn torn Juli Sala, responsable der airau de desvolopament esportiu ena RFEDI, concretaue que

Esqui aupin

Beret tanben acuelhie ena dimenjada eth VI Trofèu FIS Blanca Fernández Ochoa damb era participacion de 150 corredores e corredors de 13 paisi. Ua competicion qu'a er objectiu de potenciar er espòrt femenin damb eth projècte 'Hemna e nhèu' deth Conselh Superior d'Espòrts (CSD).

Er estadium Fernández Ochoa de Beret acuelhie 4 eslàloms, era especialitat ena que Blanca artenhèc era midalha de bronze enes Jòcs Olimpics d'iuèrn de 1992, era prumèra midalha olimpica femenina individuau der espòrt espanhòl.

Dissabte era esquiadora andorrana Etna Pou s'imposaue ara corredora locau e membre dera equipa estatau, Nur Torres (CAEI-FCEH). Eth tresau lòc siguèc tà Blanca Bagaria (LMCE-FCEH)

En categoría masculina, era pròva siguec dominada per aranés Marc Ubeira (CAEI-FCEH). Er esportista de RFEDI, que competíe en casa, superaue ath sòn companh ena equipa nacional, Luken Garitano (IRIMO-NKEF) e a Simon Jorge Calzado (CAEI-FCEH), aguest integrant deth Centre de Tecnificacion d'Espòrts d'Iuèrn dera Val d'Aran (CETEI).

Dimenge damb ues condicions cambiantes, era andorrana Etna Pou tornaue a guanhar e ac hège damb mès de 4 segons de diferencia damb era segona Blanca Bagaria. Era tresaua classificada, Paola Sainz (FORMIGAL-FArgDI) arribaue a 10 segons.

Ena categoría masculina, er andorran Max Black superaue a Eric Doliwa (RTS-NKEF) e Javier Fernández (WCAMP-FAnzDI).

Taula redonda en clau femenina

Ath delà dera competicion en Otèl Meliá de Vielha se hèc ua taula redona damb Paula Fernández Ochoa, responsabla der airau 'Hemna e Nhèu' dera RFEDI, e Edurne Pasaban, era alpinista mès guerdonada deth país e un clar exemple de lideratge femenin. Era convèrsa virèc ath torn de com trabalhar eth lideratge entre es hemnes, en ua accion impulsada a trauès deth projècte 'Hemna e Espòrt' deth Conselh Superior d'Espòrts (CSD) ena que i participèren es joenes esportistes deth CETEI dera Val d'Aran e des auti centres qu'ath maitin auien competit en Beret.