Cap acòrd sus ubanisme entre eth Govèrn e eth Conselh mès òc en finançament e medi ambient

Eth Síndic d'Aran s'a mostrat molt crític tamb era prepausa deth Departament de Politica Territoriau sus era futura comission d'urbanisme, en tot afirmar que rebohe "absolutaments tot eth sòn contengut". Entà Barrera, qu'a agut eth document sonque 24 ores abantes dera amassada que s'a celebrat en Arròs, er hèt qu'era propòsta place en Lhèida era sedença dera comission, evidencie que eth decret diluís eth reconeishement dera identitat e er autogovèrn d'Aran. En aguest sentit, Barrera demanarà ath Govèrn que comence de zero era propòsta de decret, qu'a de substituïr eth qu'auie aprovat er anterior executiu dera Generalitat e tamb eth quau eth Conselh i ere d'acòrd, encara que non s'arribec a desvolopar. Eth Síndic a assegurat que eth nau text "desvirtue e uede de contengut era comission d'urbanisme dera Val d'Aran". Per aute costat, eth conselhèr Carretero a reconeishut qu'er urbanisme ei ua matéria "sensible" e a manifestat que cre qu'es dues institucions arribaràn a un acòrd en es pròplèu mesi. Ath marge d'aguest desacòrd, era comission de traspassi Generalitat- Conselh a pogut auançar en diferentes matéries, especiauments peth que hè ath finançament de quauques competéncies. Era Generalitat s'a comprometut a aportar es 300.000 èuros pendents de traspassi entà eth sistema sanitari aranés, as quaus se i higeràn 700.000 èuros mès entara pròplèu dotacion. De hèt, era melhora deth finançament sanitari a estat ua des qüestions qu'a destacat eth síndic, qu'a valorat coma "molt positius" es acòrds artenhuts. En er àmbit de Benestar Sociau, eth govèrn a comprometut eth finançament entara reforma dera residéncia geriatrica, tamb ues òbres que permeteràn doblar era actuau capacitat. Eth síndic confie que es trabalhs poguen començar en ostiu der an que ven e que siguen acabadi eth 2006. En matéria de medi ambient, era Generalitat traspassarà ath Conselh era gestion des compensacions economiques per atacs der os, era neteja des airaus forestaus des torns des nuclèus de población, e un compromís entara melhora dera pista d'Arres Dejós a Arres Desus. Finauments, en airau d'Educacion, eth govèrn assumirà es òbres de reforma dera bastissa de Casau entà hèr-i era Escòla d'Ostalaria. Era Generalitat pagarà era construccion des codines e es aules, mentre que eth Conselh s'encargarà dera melhora dera residéncia d'estudiants. Tot e es acòrds artenhuts, eth síndic advòque eth besonh qu'era comission de traspassi age mès "sensibilitat" peth que hè as demandes d'autogovèrn d'Aran.