Condemnat a 18 ans er òme que abusèc sexuaument de dues hilhes e 5 menors ena Val d'Aran

Era Audiéncia de Lhèida a condemnat a 18 ans de preson, 8 ans de libertat susvelhada e 9.000 èuros de multa ar acusat d'abusar sexuaument de set menores en Aran entre eth 2011 e eth 2020. Dues des victimes son hilhes sues. 

Era peticion dera Fiscalia ère fòrça mès nauta --38 ans-- mès er agressor a arreconeishut es hèts en escambi de pactar era rebaisha dera pena. 

Hè tres mesi lo jutgèren, tanben ena Audiéncia de Lhèida, per abusar d'ua amiga des hilhes e l'absolvèren.

Reconeish es agressions

Damb er acòrd entre es parts, er acusat, de 42 ans, admet auer abusat pendent nau ans des sues dues hilhes, ua neboda e quate amigues des mainades. 

Ua des hilhes, ara que tanben li aurie hèt fotografies, ère menor de 13 ans en moment des agressions. E ei per aguest cas qu'a arrecebut era condemna mès nauta: 8 ans de preson.

Pacte de conformitat 

Coma didíem, er inculpat a arreconeishut es hèts aguest dimèrcles ena Audiéncia de Lhèida dempús d'un pacte de conformitat entre era defensa, era acusacion particulara e era Fiscalia, que iniciauments sollicitaue ua condemna de 38 ans de preson. 

Era avocada der acusat, Montse Cardet, a arreconeishut qu'era madeisha a recomanat ath sòn client un pacte pr'amor que 

"mos afrontàuem a fòrça ans de preson e era pròva ère fòrça assolidada. I auie fòrça testimònis. I auie informes medicaus e reauments mos vengui un shinhau en contra." 

Era condemna pactada tanben includís ua multa de 9.000 èuros e indemnizacions entàs 7 victimes per valor de 43.000 èuros mès.

Eth passat 24 de seteme, eth madeish òme siguec jutjat per auer hèt tocaments a ua amiga des hilhes. En aqueth cas òc que se hèc era vista e neguèc es acusacions. Aguesta setmana a gescut era senténcia e l'an absolvut per fauta de pròves pr'amor qu'era victima non compareishec en judici.