Era piscina deth palai de gèu de Vielha pòt tornar a daurir ath public
Temperatura der aigua 24 grads e miei. Damb aguestes condicions, era piscina deth Palai de gèu de Vielha a podut tornar a daurir ath public. A despiet que non ei era temperatura desirada per fòrça usatgèrs , ei era mínima que mèrque era normatiua entad aguest tipe d'installacions.
Mès alavetz per qué s'auec de barrar era piscina pendent ua setmana ?
Ua des vielhes caudères, era unica que ei en foncionament , non trebalhe a plen rendiment . Non cahue pro e ath delà, es dipòsits d'aigua cauda sanitària tanben an pèrtes e non mantien era aigua a temperatura nauta.
Deficiéncies en isolament dera estructura dera bastissa tanben contribuïssen ara pèrta de calor, com explique eth tinent d'alcalde , Alberto López:
Non sonque ei era temperatura dera piscina senon era temperatura ambientau der espaci. Toti sabem qu'eth tet dera bastissa a una pèrta de calor molt importanta e aquerò hè, qu' eth contrast entre era temperatura dera piscina e era der exterior sigue molt mercat.
Er ajuntament a agilizat es tràmits entà cambiar era caudèra en desús de gasòil, per ua de gas. Ath delà en aguesta prumèra fase tanben se cambiaràn es dipòsits d'aigua cauda sanitària, çò que supausarà ua inversion totau de 100.000 euros.
En ua dusau fase s' installarà un sistèma de aerotèrmia que permeterà combinar energia termica entara climatizacion e heired entara pista de gèu.
Tanben s'abordarà eth cambi der hilat des canoades d' aigua.
Es òbres s'auràn de finançar damb hons der ajuntament e es ajuts economics de d'autes institucions, com eth Conselh Generau d'Aran, era Diputacion de Lleida e era Generalitat.
De moment se mantien es oraris des corsi de natacion e activitats en aigua , totun, er ajuntament ei dubèrt a escotar es reclamacions des usatgèrs e retornar o suspéner temporaument es abonaments s' era piscina s'a de tornar a barrar o decidissen non hèr-ne ús, perque era temperatura der aigua non ei era desirada.
