Era processionària auance e arribe cada còp a mès altitud
Era expansion dera processionària, tanben en Pirenèu, ei un hèt e es expèrts constaten que cada còp arribe a mès altitud. Enguan ena Val d'Aran a calgut tornar a hèr tractaments damb elicoptèr entà contier-ne eth sòn auanç.
Es bòsqui de Vila, Montcorbau, Vilamòs e Arres, es zònes mès solanères dera Val d'Aran, ven coma d'an en an era plaga dera processionària auance. Ara, dempús de 4 ans, s'an tornat a hèr tractaments aerians, a diferéncia de campanhes anteriores, a on es tractaments se heren en camions. Es aerians son tractaments mès extensius e s'aplique un producte biologic -eth Bacillus thuringiensis Kurstaki-, compatible damb era agricultura ecologica e que non afècte es vertebradi.
"Eth sistèma mès rapid tà actuar laguens dera massa arbrada, ei er elicoptèr. Es camions son utils entà tractaments puntuaus. Nosati les utilizam apròp des airaus de léser, perqué aquiu s'i concèntre mès gent. En cambi damb es aerians podem actuar sus tota era massa arbrada e ei mès omogenea", afirme Mai Monge, tecnic der Airau de Miei Ambient deth Conselh Generau e responsable deth seguiment d'aguesta plaga.
Un aute efècte deth cambi climatic
De costum, es temperatures negatiues sostengudes en temps frenauen er auanç dera processionària. Totun, hè aumens 10 ans qu'aguestes condicions non se dan ena Val d'Aran. Per açò, era plaga auance e, ath delà, guanhe altitud, com afirme Monge:
Eth problèma ei que darrèrament ja non auem gelades contunhades e açò favorís que cada còp i age mès processionària. Ath delà, abans se parlaue que es 1.500 mètres èren era altitud maxima d'aguesta plaga e ara mos trapam que cada viatge puge mès
Era processionària guanhe terren ena Val d'Aran
Ena Val d'Aran se contròtlen 17 airaus afectadi pera processionària. Es tractaments per via aeriana an demostrat ua efectivitat deth 80% ena mortalitat des gatamines o aurugues. En aguest sens, se confirme qu'eth tractament mès efectiu entà combàter era processionària en ei er aerian e s'a de hèr ena tardor, enes prumèri estadis de desvolopament des gatamines.
Ara fin de cada iuèrn, damb era collaboracion deth Còs d'Agents Ruraus dera Generalitat se hè ua cartografia des afectacions per grads, que van entre er 1 e eth 5. Era superfícia totau afectada en tota Catalonha en iuèrn deth 2023-2024 siguec, apuprètz, de 95.000 ectares.
