Era Trail Vielha Molières 3010 daurís inscripcions tara 10au edicion

Era trail Vielha Molières 3010 ven de daurir es inscripcions entara que serà era 10au edicion.

En 2025 es participants dera maraton demorauen sense auer era fòto en tuc deth Molières per questions metoerologiques e de seguretat, mès entath 2026 demoren poder complir damb eth programa.

Nauetats tara edicion 2026

Ath delà dera maraton ath Molières e era mieja maraton ath Montpius, torne era Tuca Trail damb un canvi de recorregut, mès entot mantier era filosofia d'ua corsa populara e tanben que sigue era prumèra opcion entàs joeni.

Ena sua 10au edicion, era Trail Vielha Molières 3010 tanben harà part deth nau circuit de corses Unit Trail que amasse a 9 des pròves mès tecniques deth calendari espanhòl. Es organizadors deth circuit vòlen hèr un reconeishement ar esfòrç individuau mès tanben ath collectiu.

Prèmis a tier en compde

En cas dera dera maraton deth Molières s'aufrís un incentiu de 2000€ entàs que rebaishen eth crono, tant en hemnes com en òmes. En categoria femenina er actuau rècord ei dera chinesa Yuanyuam Wu que arturaue eth relòtge en 7 ores 27m 42s, mentre qu'en categoria masculina, eth record qu'ei deth corredor de Sòria Dani Izquierdo Alonso que completaue es 42 kms e 4200m de desnivèu en 5 ores e 43m

Ath delà des prèmis de cada corsa, eth classament dera Unit Trail intègre es modalitats per equipes e individuau e repartirà 18.000 èuros, ath delà de bèques esportiues destinades as categories juveniles de 15 a 23 ans.