Era UE Bossòst, er unic equip amateur espanhòu que jògue ena Liga francesa de fótbol

Entàs ueit e mieja dera vrespada , es dimars e es dijaus , son es unics moments enes que es jogadors dera Union Esportiua Bossòst pòden entrenar.

Ei er unic equip amateur der estat espanhòu que jògue en França. De hèt forme part dera Federacion francesa de fótbol des des ans 20 deth segle passat. 

Atau ac explique Jordi Delaurens, membre dera junta directiua.   "Eth tunel de Vielha ère barrat, e en iuèrn  eth pòrt dera Bonaigua non ère en condicions.  Alavetz era gent que portaue eth club en aqueth moment, eth fondador e president,  Manuel Huguet, decidic de jogar en districte de Cominges "

Miguel Almansa, eth president, joguèc de portèr enquiàs 42 ans, e ara les entrene. Eth Bossòst ei er unic club que quede en Aran; per aquerò era plantilha ei formada per jogadors de toti es pòbles e de diferentes nacionalitats.

Jòguen ena tresau division , a on ara son ara mitat dera classificacion, e tanben competissen ena copa d'Occitània e era copa de França. Entad aguesta darrèra i poden accedir toti es equips, per modèsti que siguen... Reconeishen que non an passat jamès des prumères rondes, mès metudi a soniar....

Igual bèth an mos tòque era loteria e podem fichar boni jogadors, e arribar a jogar damb eth Paris-Saint Germain, era finau dera Copa de França. Qui ac sap...

Es equips des categories inferiores e dera escòla de fótbol son més nombrosi, e eth relèu deth club ei assegurat, mès com es seniòrs, tanben an decidit competir en França e com ditz eth president, non pensen cambià'c.

  " Prumèr perque mos trapam  molt ben aquiu e dusau, perque i a ua distància considerable entà jogar en Lleida, perque non i a cap de equip apròp e mos calerie dues ores e mieja entà anar tà cadun des desplaçaments ; e en França, en ua ora o ora e mieja ac auem prèst "

Mès non sonque eth fótbol aranés ei internacionau. Era Associacion de Petanca de Les, forme part dera Federacion Francesa de Petanca e participe en totes es competicions que se hèn ar aute cant dera termièra.