Eth Conselh Generau cree Aran Salut, qu'agroparà es servicis d'atencion sociosanitària
Eth Conselh Generau d'Aran a creat era empresa publica Aran Salut, integrada en Servici Aranés dera Salut, entà agropar toti es servicis d'atencion sanitària e sociau. Aran Salut neish dempús deth traspàs des competéncies per part dera Generalitat e includís era gestion der Espitau de Vielha, que enquia ara ère concertada tamb era Aliança.
1 min
Era Generalitat traspassèc ath Conselh Generau d'Aran es competéncies en matèria de sanitat en hereuèr deth 2002, e es d'atencion sociau eth passat mes de deseme. Era voluntat deth Conselh ei integrar toti es servicis dera Val en un solet sistema de gestion. Serà a trauèrs dera empresa publica Aran Salut, creada a partir deth Servici Aranés dera Salut. Eth sosdirector deth servici, Felip Benavent, a explicat qu¡era Val d'Aran "a ua poblacion acotada, tamb uns besonhs concrets, e s'an de dar solucions des d'ua unica formula de gestion". Tamb Aran Salut, s'artenherà "ua gestion mès propera ath personau sanitari, e mès eficient ara ora de decidir besonhs d'inversion o formatius". Aran Salut a assumit des d'aguest mes d'hereuèr era gestion der Espitau de Vielha, traspassat pera Generalitat en 2002, mès encara tamb ua gestion concertada tamb era Aliança. Ath delà, Aran Salut integrarà er Airau Basic d'Atencion Primària de Vielha e era mieja dotzena de consultòris mèdics que i a en diferents nuclèus de poblacion. Es servicis sociaus tanben formaràn part d'Aran Salut. Se tracte dera Residéncia de Sant Antoni, entara gent grana, eth Servici d'Atencion de Base e eth Centre de Prevencion entà mainatges. En totau, eth servici public sociosanitari integrarà un totau de 140 professionaus.
