Eth Parlament tramitarà pera via rapida era singularitat d'Aran
Eth Parlament de Catalonha a balhat era sua conformitat tara tramitacion, pera via rapida, dera singularitat administrativa d'Aran. Era proposicion de lei arribaue aguest dimèrcles en plen ena cambra catalana en ua prepausa conjunta des grops deth PSC, Junts, es Comuns, ERC e era CUP.
Çò que demane eth tèxte ei que era Lei de Bases de Regim Locau s'aplique en Aran sonque de forma supletòria, ei a díder, unicament en aqueri casi non previsti pera Lei d'Aran. Ena practica, supausarà qu'eth Conselh Generau deishe d'èster considerada coma ua administracion locau a efectes administratius e legaus.
Era tramitacion pera via de lectura unica siguec aprovada per 107 vòts a favor -es deth PSC, JUNTS, ERC, COMUNS, CUP e Aliança Catalana), 15 abstencions per part des deputats deth PP e 11 vòts en contra de VOX. Açò permeterà qu'aguesta proposicion de lei pogue èster aprovada definitiuament en un plen que, previsiblament, s'amiarà eth 25 de hereuèr.
Consens majoritari des grops
Era d'aguest dimèrcles siguec ua bona escadença entà conéisher quin nivèu de compromís - e de coneishement- an es desparières formacions sus era singularitat d'Aran.
Iniciaue eth debat era deputada deth PSC e vesia de Sòrt, Neus Comes, que remercaue eth compromís deth Govèrn socialista entà garantir e respectar era singularitat e era autonomia politica d'Aran.
La seguie enes intervencions ua auta pirenenca, Jeannine Abella, que tanben ei era bailessa d'Isona i Conca Dellà. Era deputada de Junts, soslinhaue que entà hèr efectiu er autogovèrn, non sonque cau reconeishement mès tanben recorsi e coneishement per part dera ciutadania. Abella tanben profitèc era sua intervencion tà trèir-li es colors ath Govèrn:
Pirenèu e Aran compartim besonhs. Èster mès luenh non signifique auer mens drets, mens oportunitats o mens drets basics e, malerosament, aquerò passe
Era deputada d'ERC, Ester Capella, destacaue qu'era prepausa aprovada represente un "pas mès" entà garantir era reconeishença d'Aran. Segontes era republicana, s'es catalans vòlen qu'eth sòn dret ara autodeterminacion sigue respectat, tanben cau acceptar eth dret deth pòble aranés a decidir eth sòn futur.
Dempús dera CUP, Xavier Pellicer argumentaue que se tracte d'ua modificacion en marc dera legalitat, qu'ei laguens des atribucions autonomiques estatutàries mès que "ei luenh de çò que pense era CUP" en relacion a coma calerie arreconéisher autant Aran coma es Païsi Catalans.
Maugrat que non se higèc ara prepausa, Aliança Catalana tanben votèc a favor dera iniciatiua. Era sua portavotz, Sílvia Orriols, reivindicaue que Catalonha a de respectar es sues realitats nacionaus e que non se pòden aplicar entà Aran solucions centralizades e pensades de Barcelona ençà.
Prepausa "simbolica" e "perilhosa"
Eth PP, que s'abstenguie ena votacion, didie en boca deth deputat Juan Fernández, qu'eth debat sus Aran ei de caractèr "essenciauments declaratiu e simbolic". En aguest sens, hijie que maugrat compréner era valor dera declaracion, considèren que non resolverà cap des problèmes estructuraus dera Val d'Aran. Segontes eth PP, calen inversions entà infraestructures e servicis publics e non declaracions simboliques.
Rafael Villafranca en nòm de Vox defenie eth vòt contrari dera formacion d'ultradreta en tot considerar qu'era proposicion non ei de bessonh e ei "perilhosa" coma possibla hònt de futurs conflictes e litigis. Segontes Vox, Aran ja dispòse d'un marc normatiu sufisent que garantís era sua singularitat.
