Eth SAeD consolide era atencion domiciliària en Aran damb ua seishantia d'usatgèrs
Er 1 d'abriu de 2022 començaue a caminar en Aran eth Servici d'Atencion en Entorn Domiciliari (SAeD), un projècte impulsat peth Conselh Generau d'Aran damb er objectiu de prestar atencion a persones granes, damb dependéncia, damb besonhs puntuaus o familhes monoparentaus, enes sues viuendes entà que poguen demorar en sòn entorn abituau e arténher atau eth sòn maxim nivèu de vida, benèster e autonomia. Tanben pòt servir de supòrt a persones nauvengudes que non an encara un hilat de supòrt en territòri.
En sòn inici, eth SAeD començaue damb ua dotzena d'usatgèrs. En aqueth moment, era Val d'Aran ère er unic territòri de Catalonha que non dispausaue d'un servici d'aguestes caracteristiques. Segontes explique era directora de Servicis Sociaus deth Conselh Generau, Eugènia Lòpez:
En inici atenguíem sustot persones damb granes dificultats de salut. Pendent aguest temps auem metut en valor era atencion sociau, e s'a ampliat fòrça eth perfil des persones atengudes
Pendent aguesti quate ans, eth servici tanben a incorporat naui recorsi, coma era teleassisténcia auançada a trauèrs de dispositius coma relòtges intelligents o iniciatiues coma eth Casau Online, que permet realizar desparières activitats en linha.
Eth procès d'accès ath servici se hè a trauèrs deth personau sociau o sanitari d'Aran Salut, mès tanben per demana dirècta dera persona interessada o dera familha. Actuaument, eth SAeD compde damb ua equipa formada per cinc professionaus que aufrissen supòrt sociau e acompanhament en diferenti encastres dera vida vidanta.
Eth creishement deth servici a estat fòrça notable. Se en 2022 començaue damb sonque 12 beneficiaris, aué eth nombre d'usatgèrs se place entre 50 e 60 persones, e lèu, non existís lista de demora.
Eth SAeD consolide era atencion domiciliària en Aran damb ua seishantia d'usatgers
Eth cas de Manuel Pena
Un des usatgers deth Servici d'Atencion en Entorn Domiciliari (SAeD) ei Manuel Pena, vesin d'Arres de 82 ans, que dempús de 16 ans, demore solet en casa - quan moric era sua mair-. Ara recep eth supòrt deth SAED dus dies ara setmana. Era integradora sociau Maria Rosales, puge entà Arres e, pendent dues ores, l'ajude en diferents gestions e li hè acompanhament, çò que contribuís a redusir eth sòn isolament.
"Sò plan content dera ajuda de Maria. Cada setmana me puge era crompa o m'ajude en çò que jo li demani. Tanben gessem a passejar o charram ua estona", comènte Manuel. Totun, a ua reivindicacion: "Sò ua persona fòrça activa, però non è carnet de coche e tanpòc è transpòrt public en Arres e açò me limite fòrça". Per aquerò, demane qu'eth SAeD tanben l'ajude a baishar entà Vielha un còp o dus ath mès tà poder hèr gestions o socializar.
De cara ath futur, des Servicis Sociaus deth Conselh Generau trabalhen en naui rèptes, coma era possibilitat d'implantar un sistèma de copagament o d'ampliar era cartèra de servicis.
