II Congrès de Ciberseguretat Armari 6: Intelligéncia Artificiau e Criptografia

Era Audiovisuau de Vielha acuelh aguesti dies era IIau edicion deth Congrès Armari 6 de ciberseguretat.

Dempús dera bona acuelhuda dera prumèra edicion, Aran torne a èster un lòc de trobada de professionaus especializadi en aguesti ahèrs.

Un congrès dinamic

Er objectiu ei aufrir airines tà poder èster ath dia de totes es nauetats e darrères tendéncies en ciberseguretat pr'amor qu'era evolucion ei constanta e presente naui rèptes, des dera supercomputacion, en tot passar pes modèls d'intelligéncia artificiau, enquiara criptografia pòst-quantica e era geopolitica.

Eth congrès, que s'alongue enquia diuendres 23 d'octobre, se presente en un format fòrça interactiu e dinamic damb taules redones, ponéncies e debats entre expèrts de naut nivèu que meteràn en comun es estratègies mès actuaus entà hèr front as ciberatacs.

Laguens deth congrès, s'a organizat era setmana dera ciberseguretat damb un talhèr entà apréner coma detectar e evitar es ciberestafes de manèra practica, qu'impartirà Tomás Moré, cap dera unitat de cultura dera Agència de Ciberseguretat de Catalunya.

Entara joenessa s'harà un talhèr sus deepfake damb eth quau saberàn identificar notícies, videos e imatges irreaus.

Armari des 6 claus

Eth Congrès pren eth nòm der istoric Armari des Privilègis o des Sies claus, deth sègle XVIII, en que se sauvauen es documents deth Conselh Generau d'Aran. Recebie aguest nòm, pr'amor qu'auie 6 panhs que sonque se podie daurir damb es 6 claus des conselhèrs.

Er armari, a on se sauvauen entre d'auti documents era carta magna dera Val d'Aran, coneishuda com 'Era Querimònia', se pòt vèir en Musèu dera Val d'Aran en Vielha