Mès de quaranta ans de pediatra en Aran
Er 11 de deseme siguec eth sòn darrèr dia ena consulta de pediatria . Era doctora Immaculada Caubet , hec eth reconeishement de seguiment a Lara, que a 6 mesi. 36 ans en darrèr ère sa mama Isabel era que venguie entara visita. Imma, a estat 44 ans, era pediatra que an coneishut aumens dues generacions d'aranesi.
Es començaments , non sigueren fàcils, ère er an 1982. Auie acabat era especialitat e auec prèssa entà tornar entara Val d'Aran . Pendent 5 ans siguec soleta, e eth telefon ère era unica manèra de compartir e consultar dubtes, damb companhs d'estudis de d'auti espitaus mès grani.
En aqueri tempsi campaues tà darrèr e non i auie absolutaments arrés, sonque un telefon de cable damb eth que podies hèr èra trucada de SOS- ajudatz-me, que me trapi ací damb aguest problèma... A viatges sonque tà comentar, tà compartir...
Damb es ans, es condicions an cambiat, e ara que plegue ei quan eth servici de pediatria està milhor, compde damb 3 mètges especialistes. Pilar Alonso , ua des pediatres, siguec ua des sues pacients. "Tostemp auíem agut fòrça comunicacion e ère quauquarren que sabíem que en bèth moment arribarie, e pensi que es dues ac demorauem damb fòrça illusion"
A Noelia Peña , era infirmièra, Imma tanben l'a vist créixer e ara hè 7 ans que trebalhen amassa, dempús que era cambièsse eth trebalh en planta pera consulta de pediatria. " Trebalhar damb Imma ei fòrça intens, mès n'è aprenut fòrça e sò contenta d'auer podut compartir es darrèrs 7 ans dera sua vida professionau"
Inquieta, e exigenta , era salut des mainatges a estat era prioritat dera doctora Caubet, per aquerò pendent toti aguesti ans s'a desplaçat entàs escòles, autant entà hèr charrades sus alimentacion, salut sexuau o salut mentau , e en tot coïncidir damb es campanhes de vacunacion, entà assegurar-se que tota era mainadèra recebe era sua dòsi. Ua accion que a hèt que es índex de vacunacion infantiu en Aran siguen des mès nauti de Catalunya
Mès era sua dedicacion ara mainadèra, tanben a passat termières, a hèt diuèrses estades coma cooperant enes camps de refugiats deth Sahara , e hè pòc mès d'un mes compartic damb ua companha de Benasc ua estada en Nepal.
Trebalhant a 3000 mètres de nautada ,visitant e hèn eth seguiment des mainatges. A estat ua experiéncia diferenta passar deth desèrt ar Himalaya, mès tostemp positiua.
Eth sòn trebalh ena consulta e en espitau acabe, e ei eth moment de plegar. Ara poirà programar milhor aguesti viatges, o dedicar-se a d'autes aficions culturaus o esportiues . Çò que ei segur, ei que seguirà implicada en ahèrs relacionadi damb era medecina, era sua passion; dilhèu en tot hèr charrades de divulgacion com era darrèra ,hè pògui dies ,damb motiu de La Marató
