Pesca electrica en arriu Garona
En Vielha, es agents de miei ambient deth Conselh Generau d'Aran an hèt pesques electriques en tram der arriu, entre pònts ara nautada der Institut, entà trèir es trueites e cavilats que i pogue auer .
Actuacions com aguesta son de besonh cada viatge que s'an de hèr trebalhs en lhet der arriu que poguen méter en perilh era fauna icticola.
En aigües tranquilles, quan eth debit der arriu ei mès baish, era pesca ei mès facila. Es agents hèn laguens der aigua ua petita descarga electrica que estordís es peishi, que se pòden agarrar mès facilament damb un hilat.
Es exemplars capturadi an estat sustot trueites miejanes e cavilats adults e un bon nombre d'alevins d'aguesta espècie autoctòna, e endemica der arriu Garona, çò que ven a demostrar que er aigua amasse bones condicions entara conservacion d'aguesta aguesta espècie protegida en perilh d'extincion.
Es trueites e cavilats, que s'an trèt en aguestes pesques electriques se lancen en d'auti punts der arriu , Garona ensús , en trams aluenhadi des airaus previsti des òbres.
