Era ròca cavalhada un guardader naturau
Tot just ara entrada d' Unha, arrinque eth nau camin que profite eth traçat dera antiga aigüèra que baishaue des de Bagergue, que servie entà regar es prats e es camps ara entrada deth pòble.
Dempús de tres ans de trebalh s'a artenhut a amassar tres punts de interès: era cabana e eth corrau d' Unha, punt de trobada des ramadèrs e es sòns ramats, era ròca cavalhada , un guardader naturau , e era còva de Perico, un endret fòrça soentejat pes pastors e pes vesins d'aguest parçan de Pujòlo.
Roger Martorell, qu' ei guida de nauta montanha e vesin d'Unha, ei un des responsables d'aguest projècte:
Ei un camin de montanha, mès non a passi complicadi. A ua part mès aeriana, en tram que crotze era ròca cavalhada, a on s'a hèt eth guardader. Aquiu s'a plaçat ua barana de proteccion e un solèr damb husta entà facilitar eth pas.
Non ei un camin planèr, a un desnivèu de 150 mètres entre eth començament e era còva, e en totau son 800 mètres de recorrut
Entara alcaldesa dera pedania d' Unha, Esther Bruna, eth condicionament deth nau camin e eth guardader , servissen entà méter en valor endrets destacats deth patrimòni naturau deth pòble
Era còva de Perico, ei ua tuta a on dromien es pastors, o es persones que non auien casa e èren de pas. Tanben i anauen es joeni e mainatges deth pòble a jogar. Era ròca cavalhada ei en un emplaçament des d'a on se pòt veir Bagergue, Gessa, Salardú e Unha, e i a ues vistes precioses
Eth nau recorrut a de servir tanben de complement entàs visitaires e esportistes que soentegen aguest airau entà accedir ara via ferrata deth Pui d'Unha.
