Gessen ara lum pintures romaniques en Tredòs
Tecniques en conservacion e restauracion an trèt ara lum aguest estiu pintures muraus d'epòca romanica, en un des murs dera capèla de Sant Estèue de Tredòs.
Son fragments d' un conjunt pictoric parciaument caperat pera estructura deth còr de husta que presentauen un estat de conservacion regular damb patologies derivades dera umiditat, era descoesion des mortèrs , e era suberposicion de diuèrses coches de caudea, de d'autes intervencions qu' auien provocat eth deteriorament progressiu des pintures.
Atau ac explique era restauradora -conservadora dera empresa TdART, Mia Marsé:
Çò qu'ei mès important ei consolidar, entà que aquerò que quede se pogue conservar...Entad aquerò injectam mortèr idraulic e delimitam er entorn dera pintura entà que quede mès fixada. Dempús se hè era neteja, e ara fin era reintegracion cromatica, qu'a d'èstèr fòrça respectuosa damb eth color originau. Sonque s'an de caperar es parts blanques que s'agen ocasionat en procès
Es pintures ath fresc, qu' èren dessús de d'autes anteriores , hètes damb era tecnica seca, des que se n'an conservat pògui fragments, representen dues escenes
Per un costat, auem a Sant Père. A despiet que non ges eth personatge sancer,sabem qu'ei eth perque auem part des sòns atributs ( claus ), tanben i a d'auti tres personatges que son es anmes qu' an d'entrar en cèu.
Ar aute cant , i a es anmes que son condemnades ath lunfèrn
Era capèla, ei propietat dera EMD de Tredòs. Entath sòn alcalde, Juanjo España ,es pintures son un tresòr que calie conservar:
Auem un tresor qu'ère amagat, ath que non se li daue cap d'importància, perque tot eth "focus" ère metut en Cap d'Aran. Auer aguestes pintures romaniques, non sonque , ei important entà Tredòs e entath Naut Aran ,senon entath patrimoni romanic e culturau dera Val d'Aran.
Enes propèrs mesi se completarà era actuacion damb eth plaçament de pannèus descriptius qu' ajuden as visitants ara lectura e era comprenença deth conjunt pictoric.
