26 ans de colònies d'ostiu ena Val d'Aran tà mainatges e mainades damb càncer
Deth 12 ath 19 de junhsèga, era Val d'Aran acuelh 95 mainatges e adolescents de 7 a 17 ans, arribadi de diuèrses comunitats der Estat, que participaràn ena 26au edicion des colònies d'estiu entà mainades e mainatges damb càncer, que se hèn ena Aubèrja Era Garona de Salardú.
95 mainatges e adolescents viuen ua setmana sense etiquetes enes colònies d'ostiu dera Val d'Aran
Mès que ues vacances.
Aguestes colònies hèn part deth programa de léser terapeutic dera Associacion contra eth Càncer e an coma objectiu ajudar as participants a recuperar era normalitat, afavorir era autonomia, era autoestima e era expression des emocions, en tot crear un espaci de convivéncia damb d'auti joeni damb es que compartissen experiéncies de vida semblantes. Pendent ua setmana, era malautia passe a un dusau tèrme: çò mès important ei hèr amistats, gaudir dera montanha, des activitats com eth ràfting, des excursions e dera convivéncia.
Deishar d'èster 'es malauts' per uns dies
En 'Eth Maitin d'Aran der ostiu' auem conversat damb eth president dera Associacion contra eth Càncer de Lhèida, Sisco Maranges, e damb Elisabet Codina, que s'estree enguan coma coordinadora des colònies e qu'a assumit recentament eth relèu de Jordi Arjò coma psicològa dera Associacion en Pirenèu e Aran, que ditz que:
Dempús de 26 edicions, aguest projècte manten intacta era sua esséncia: arténher que, encara que sigue sonque pendent uns dies, es participants deishen d'èster eth mainatge damb càncer, entà tornar a èster simplament mainatges e adolescents.
Toti dus tanben destaquen eth papèr des amistats que s'i creen, fòrça d'eres mantengudes pendent tot er an, e coma bèri antics participants acaben tornant, ans dempús, coma monitors o voluntaris, en tot hèr créisher un projècte que ja ei un referent en tot er Estat. Entath president dera Associacion contra eth Càncer de Lhèida, Sisco Maranges:
Abans era amistat s'acabaue quan finalizauen es colònies. Ara, eth mobil e es hilats sociaus ac an cambiat. Se parlen tot er an. E çò que mès demoren, fòrça viatges, non ei eth rafting...ei retrobar es amics.
Era passada edicion, fòrça especiau peth 25au aniversari, amassèc ancians participants, exmonitors e voluntaris, entot demostrar que fòrça des relacions creades enes colònies se mantien ath long deth temps.
