Un administratiu entar ajuntament de Bausen dempús de 13 ans
Contentes e satisfètes, se mòstren era bailessa Alidè Sans, e es membres dera equipa de govèrn, per poder compdar damb eth supòrt d' un administratiu fixe en ajuntament.
Des de començament de seteme, aguest petit pòble de 70 vesins e vesies , pòg a pòg va recuperant era normalitat, dempús de fòrça ans d'inestabilitat financèra e de precarietat administratiua, com explique Alidè Sans:
Èm molt contentes. Quan entrèrem en 2023 sabíem qu'auíem un rèpte molt ambiciós per deuant, mès sabíem qu'auíem d'afrontar-le perque non se podie continuar metent "parches". Calie acabar damb era situacion de bloqueg. Auem passat per fòrça etapes entà complir aguest gran objectiu, qu' ei poder contractar un foncionari municipau dempús de tanti ans.
Barram ua etapa , e en daurim ua auta, fòrça illusionanta.
Des deth 2023, s'a amiat a tèrme un intens trebalh de sanejament financèr qu'a permetut méter ath dia mès d'ua decada de compdes, desbloquejar subvencions, aprobar pressupòsti e guanhar un litigi dubèrt damb Endesa
En guanhar aguest judici damb Endesa, auem podut sauvar tàs arques municipaus, mès de 500.000 euros , mès interèssi.
Damb era incorporacion deth nau administratiu, que ei tanben vesin deth pòble, se garantís un servici d'atencion regulara ath public dus dies per setmana. Es sues foncions inclodiran tanben era gestion documentau, eth registre electronic , era tramitacion d'expedients e eth supòrt as tecnics municipaus.
Pau Gómez, ei aragonés, coneishec Bausen, e pensèc qu'ère un bon lòc tà víuer. Quan veiguec era oportunitat laborau, non dubtèc en presentar-se ara convocatòria
Auia ganes de hèr un cambi de vida , e ací trapè era oportunitat. È fòrça ganes de trebalhar, entà tirar er ajuntament en deuant, meter-le en marcha , e ath dia.
Entara regularizacion administratiua e financèra deth consistòri, er ajuntament a compdat damb era collaboracion dera Deputacion de Lhèida e eth supòrt tecnic deth Conselh Comarcau deth Pallars Sobirà.
