Cors de guides deth patrimòni aranés

Era directora deth Musèu dera Val d'Aran, Carla del Valle, hè ua visita guidada ara glèisa de Sant Andreu de Salardú.

Aguesta totun non ei ua visita normau. Es assistents son es inscrits en cors de guides deth patrimòni aranés , ua iniciatiua deth madeish musèu entà apregondir ena coneishença dera istòria, era lengua, es tradicions e eth patrimòni culturau dera Val d'Aran .

Eth cors a estat impartit per professionaus des airaus de cultura, musèus, lengua e nivologia deth Conselh Generau d'Aran , ath delà d'especialistes en istòria der art e era arqueologia.
Aué tòque Pujòlo , mès abans en Vielha es alumnes an hèt ua inmersion ena identitat aranesa. En Betren, Arties e Garòs,apregondiren en patrimòni religiós e arqueologic.
En Lairissa eth cors les apropèc as activitats tradicionaus, e en Quate Lòcs es charrades se centrèren sustot enes tradicions.

Entre es alumnes, perfils diuèrsi: guides de montanha , guides culturaus, jubiladi e personau pròpi des musèus qu' an agut e hèr 40 ores de formacion. Un format intens, mès que a agut plan bona acuelhuda.

Entà Meritxell Centeno, guida deth Parc Nacionau d'Aigüestòrtes, aguest ère un cors de besonh, perque, " es grops que vien entath Pirinèu acostumen a visitar es tres comarques, eth Pallars, era Ribagorça e Aran".

Entà Marc Pérez, guida de nauta montanha, eth cors a de servir entà apregondir es sòns coneishements.

Damb es coneishements aqueridi, es assistents an agut de hèr ua pròva practica, ua presentacion orau sus un des elements patrimoniaus visitadi , entà obtíer era acreditacion oficiau de guida deth patrimòni.