Objectiu Pompièrs d'Aran : assolidar era gestion integrau des emergéncies

Eth plan director 2026-2030 definirà es linhes d'actuacion ena gestion des Pompièrs e es emergéncies en Aran.  Atau, fixe entre d'autes causes,  un  plan de formacion continuada  entàs pompièrs ,que permeterà establir es categories laboraus, era convocatòria de naui procèssi de seleccion de volentaris , e era reforma e ampliacion deth parc de Vielha.

 Tanben prevee eth renauiment des equipaments , com era licitacion d'ua autoescala e milhores tecnologiques de comunicacions. 

Era consolidacion deth plan de cremes controlades, e era formacion d'especialistes en escandiment de huecs forestaus ei un des rèptes entar an que ven, com ac explique eth major des pompièrs Manel Bosch

Auem format especialistes de nivèu 1 ,e ara les formaram de nivèu 2 . Uns  son es caps de crema, es auti la executen. Açò ac haram dera man deth GRAF.

Ací auem un auantatge , tota aguesta formacion  ja ei adoctrinada, perque era Generalitat hec un esfòrç molt gran, e auem era sòrt de compartir era sua generositat. Damb eth GRAF  començaram a hèr pròves dehòra dera Val d'Aran entà especializar-mos, e eri vieran tad ací entà ajudar-mos damb es cremes .

En acte de celebracion dera Hèsta de Santa Bàrbara, patrona des pompièrs,   era sindica  Maria Vergés anoncièc qu'eth govèrn  a encetat convèrses damb eth Departament d'Exteriors dera Generalitat  e eth  Ministèri d'Exteriors, entà estudiar era possibilitat de establir estratègies conjuntes transtermierères  entà oficializar  linhes actuacion en matèria d' emergéncies e proteccion civila, urgéncies sanitàries, transpòrt public o lengua. 

DISTINCIONS E MENCIONS AUNORIFIQUES PES ANS DE SERVICI ATH CÒS DE POMPIÈRS

Ua cinquantea de pompièrs an estat  guardonadi damb es medalhes d'aur, argent e bronze, ues distincions reconeishudes en reglament deth còs de pompièrs e en reglament d' aunors e distincions deth Conselh Generau d'Aran, que reconeishen  as pompièrs o persones extèrnes  qu'an prestat es sòns servicis enes pompièrs enes darrèrs, 20, 25 e 35  ans. 

Ath delà se liurèren tanben mencions aunorifiques. Antonio Taull, ara pompièr veteran, ath delà dera medalha d'òr recebec ua d'aguestes  mencions  per tota era sua trajectòria enes pompièrs ,que comencèc en an 1985.

Eth Conselh Generau d'Aran assomic era competéncia dera  gestion integrau de pompièrs- emergéncies en gèr deth 2023.