Puge era taxa toristica en Aran
Es esquiadors, e es toristes que s'alòtgen a compdar d'aué, enes otèls, pisi toristics, cases ruraus, aubèrges o càmpings, dera Val d'Aran , an de pagar un shinhau mès , pera taxa toristica.
Er 1 d'abriu ère era data prevista dera entrada en vigor der aument dera taxa ena ciutat de Barcelona e era rèsta de Catalunya.
Atau es clients ,qu' amplissen aguesti darrèri dies dera sason,es establiments , e que ja auien hèt damb fòrça auança era sua resèrva, quan acabe era sua estada, auran de pagar era naua taxa. Com exemple, en un otèl de 3 estrelhes er impòrt passe des 60 cèntims per persona e net , a 90.
Entà Javier Lamo, que passe aguesti dies de vacances en familha, es portaus de resèrves aurien d'informar milhor des quantitats a pagar pera taxa
Calerie inclodi'c perque quan hèm vacances mos agrade saber quan mos costarà eth totau dera estada, independentament de s' ei entà pagar ar otèl, ar intermediari o entà pagar ua taxa toristica
Pera sua part eth Grèmi d'Ostalaria dera Val d'Aran, se mòstre fòrça crític damb era pujada . Entath sòn president Carles Sigüenza, non s'a escotat era opinion deth sector, e non s'an agut en compde cap des sues prepauses, entà adaptar era taxa as singularitats territoriaus.
Nosati prepausèrem qu'es comarques de montanha se mantenguessen com enquia ara , non hèr era pujada, entà non hèr pagar mès as nòsti clients, sustot perque un viatge s'an acabat es sasons toristiques d' iuèrn e estiu, era rèsta der an fòrça des clients son trebalhadors, e çò que prepausauem ei que non auessen de pagar o podessen recuperar es sòs de bèra manèra
Er aument dera taxa ei progressiu,e en abriu deth 2027, er impòrt serà eth doble deth que se pagaue enquia ara.
Vielha que ara requèpte 160 mil euros, duplicarà es ingrèssi er ar que ven. Ath delà er ajuntament com era rèsta de municipis de Catalunya , e com ja ac hè er ajuntament de Barcelona, tanben poderà aplicar un recargue, com ac explique, er alcalde Juan Antonio Serrano
Da era libertat as ajuntaments d'aplicar eth recargue a diferenti tipes e categories d'establiments . Ei un tèma que s'a de valorar fòrça ben, perque eth tèma impositiu tostemp ei problematic e s'a de pensar ben. Ac estudiaram e preneram era decision quan tòque
Er increment dera taxa toristica a coincidit damb es darrèri dies dera sason d'esquí. Baqueira Beret barrarà com auie previst deluns de Pasca. Ara demora deth recompde finau, prevee resultats semblanti as des darrères sasons, en que se superèc eth milion d'esquiadors.
