Sies formacions polítiques se presenten as eleccions ath Conselh Generau d'Aran
6.675 aranesi escuelheran eth 25 de mai es 13 conselhèrs que formaràn eth Conselh Generau d'Aran es pròp lèu 4 ans. Es representants deth govern aranés s'escuelhen enes sies circumscripcions en que se dividís eth territòri e que coincidissen damb es sies terçons istorics.
1 min
Eth nombre de conselhèrs le definís eth cens de poblants. Atau, es dus terçons deth Naut Aran, Pujòlo e Arties e Garòs, auràn dus conselhèrs cadun. En Castièro, a on se trape era capitau Vielha s'escuelhen 4 conselhèrs. Enes terçons de Marcatosa e Lairissa se trigue un representant e en Quate Lòcs en Baish Aran es conselhèrs elèctes seran tres. Er actuau síndic Carlos Barrera de Convergéncia Democratica Aranesa torne a presentà-se ara reeleccion. Eth rèpte de Barrera entara pròp lèu legislatura ei era definicion deth Plan Generau d'Urbanisme e eth Plan d'Ordenacion Territoriau dera Val d'Aran. El principau rivau de Barrera en aguesti comicis ei Paco Boya. Eth diputat deth PSC en Parlament de Catalunya, ei eth candidat dera coalicion Unitat d'Aran. Progrès Municipau- PSC. Se ei esculehut síndic Boya, vò arténher que eth Conselh Generau sigue ua institucion mès participativa. A mès de Convergéncia Democratica Aranesa e era coalicion Unitat d'Aran- Progrès Municipau-PSC tanben presenten candidatura ath Conselh Generau, Union Democratica Aranesa, eth Partit Popular, eth Partit Renovador d'Arties e Garòs e era Agropacion d'Electors Amassadi per Aran.
