Un relòtge de nautada
Eth campanau dera glèisa de Sant Joan Baptista de Les, damb mès de 31 mètres de nautada, siguec bastit entre es segles XVIII e XIX e a estat objècte de fòrça reformes, qu' an anat modificant eth sòn aspecte exterior.
Cò que mès destaque ei eth relòtge , era barana neoclassica ena part superiora e eth tet a quate cares.
Entre eth 2011 e eth 2015 s'amièc a tèrme era restauracion dera glèisa, se treiguec er encalat blanc des murs e se deishèc a pèira vista. Ara ei eth torn des trebalhs de consolidacion e milhora der accès ara tor deth campanau.
Era vielha escala de husta, en quaqui trams fòrça arribenta , ère en fòrça mau estat, damb gradons e tirants que tenguien era estructura trincats, o poirits, que non garantien era seguretat des persones o operaris, qu' an de pujar ara sala de campanes o entà dar còrda ath relòtge.
Per aquerò s'a decidit de bastir ua naua escala de husta, entà que eth campanau pogue èster visitable, autant er espaci des campanes com er humaralet, a on ei era maquinària deth relòtge, un corneret, a lèu 30 mètres de nautada ath que sonque i an agut accès enquia ara uns pògui privilegiadi.
Uns trebalhs que an eth supòrt economic dera Diputacion de Lleida e eth Departament de Cultura dera Generalitat, com apunte er alcalde de Les, Andreu Cortés
Damb aguesta actuacion , çò que vam a arténher ei poder accedir damb seguretat e garanties, e poderam hèr que era tor sigue visitable perque forme part deth patrimòni deth nòste pòble. Ath delà auem un relòtge, dera prumèra mitat deth segle XX, qu'ei ua jòia que la cau méter en valor. Se poderan programar visites entà poder accedir a un des campanaus mès nauti dera Val d'Aran
Ath delà dera naua escala, tanben s'apraiaran es henerècles des murs damb mortèr de caudea e se renauirà era installacion electrica . Se barraran hièstres e se plaçaran params entà que non poguen entrar es coloms. Es òbres qu' acabaran aguesta primauera an un pressupòst de lèu 160.000 euros.
