Vandalisme en refugi de Besiberri: era FEEC presentarà denóncia
Vandalisme en refugi de Besiberri: era FEEC presentarà denóncia
Un vídeo que se hèc viral enes hilats sociaus, denonciaue eth mau estat en qué se trobèren eth refugi d'emergéncia de Besiberri, damb destròces e fòrça lordèra en interior. Era situacion la descorbiren excursionistes dera Societat Amics dera Montanha de Tremp, que qualifiquèren lo que vederen de "dantesc" e volgueren alertar dera problematica e daurir un debat sus era regulacion des accessi.
Era Federacion d'Entitats Excursionistes de Catalonha (FEEC) comunicaue es hèts as Mòssos d'Esquadra e, per prumèr viatge ena sua istòria, presentarà ua denóncia per actes vandàlics. Segontes eth sòn vicepresident, Josep Casanovas,
non se tracte d'un cas isolat, senon d'ua tendéncia creishenta, especiaument en refugis isoladi que son basics en iuèrn
Eth refugi, plaçat en Parc Nacionau d'Aigüestòrtes e Estanh de Sant Maurici, ei un espaci pensat exclusivaments entà emergéncies e ei pairinat peth Club Excursionista Vilaller, que se n'encuede deth mantieniment de manèra altruista. Dempús d'ua prumèra neteja e des trabalhs d'endreçament, eth refugi ja torne a èster operatiu.
Des dera FEEC s'anoncien naues campanhes de sensibilizacion e s'apèle ara responsabilitat collectiva entà preservar aguesti espacis, en tot rebrembar qu'era solidaritat ena montanha ei clau entà mantier operatius aguesti equipaments.
