Un pamflet anonim dirigit as aranesi difon es sòus de nauts cargues politics dera comarca

Es abitants dera Val d'Aran an recebut en casa sua un comunicat anonim a on s'hen publics es sòus de totes es persones que trabalhen como personau eventuau de confiança en Conselh Generau d'Aran, includit eth deth madeish síndic, Carles Barrera. Eth pamflet anonim, repartit en totes es boètes dera comarca, tanben informe des sòus de nauts cargues coma eth director generau des Pompièrs, eth cap de Cultura e Ensenhament, eth director de Torisme dera Val d'Aran e es maxims responsables deth Servici Aranés dera Salut e d'Aran Salut. Entà contestar aguest comunicat, Barrera a hèt publica ua carta dubèrta dirigida as ciutadans dera comarca en què afirme que tamb era aparicion d'aguest pamflet ei evident que ja a començat era campanha electorau. Segontes eth síndic, ua accion coma aguesta sonque se pòt interpretar coma prauba oposicion a ua accion de govèrn e ar interés de perjudicar Convergència Democratica Aranesa. Ena missiva, Barrera tanben formule as ciutadans era pregunta de se consideren que governe qui governe en Conselh Generau d'Aran, es foncions que actuauments devolupen aguestes persones seràn eliminades. Rebrembe tanben qu'era valoracion deth personau eventuau, en què incidís eth comunicat anonim, l'an de hèr es politics en funcion des resultats e eficàcia laguens des sòns ambits de responsabilitat.