Animaus d'ací e de dehòra conviuen en AranPark
Es darrèri mesi dera primauera e er estiu, son era sason nauta en Aran Park, eth parc de fauna deth Portilhon. En aguestes setmanes deth mes de junh, soentegen enes installacions es alumnes des escòles d'ací, o es grops organizadi que son de visita en Aran.
Eth parc que dauric es sues pòrtes en tot coïncidir damb era setmana santa presente, enguan coma nauetat era incorporacion d' exemplars de dues espècies , era lèbe dera Patagònia, e es petiti marsupiaus, coneishudi com walabí o,ualabí que son originaris d'Austràlia
Son dera madeisha familha que es cangurs. An un aspècte fòrça semblant, mès era grana diferéncia ei que son fòrça mès petiti.
Son animaus de bòsc , que s'an adaptat fòrça ben
Mès ath delà dera expectacion que pòt desvelhar era incorporacion de naues espècies en parc, çò que mès valoren es responsables e cuedadors des animaus, ei era bona adaptacion de toti es animaus, sustot des que son mès autoctònes, com es crabes, es cèrvis, es isards . Espacis grani e damb un entorn sauvatge de vegetacion, que se traduís cada an en naui neishements en totes es espècies, sustot en primauera, com mos explique Gemma Segura, educadora ambientau deth parc
Era primauera ei era sason des neishements. An neishut bòvids, ua craba sauvatge, un muflon, e enguan per prumèr viatge es lops grisi an agut dus petits, un mascle e ua femelha
Es cadèths de lop gris, ara son dificils de veir d'apròp, mès segur , que serà mès fàcil, ben lèu, des der observatòri que i a ath laguens deth sòn barratge.
Damb un suplement de 5 euros, s'aufrís era possibilitat as visitants de veir e interactuar damb es lops a trauèrs d'un gran hiestrau ,sonque separadi per un veire. Tanben i a era possibilitat d'alimentar-les a trauèrs d'uns tuèus que connècten damb er espaci.
Aguesta ei ua naua experiéncia a descorbir en Aranpark, que se some ara activitat de èster cuedador per un dia, o as visites nocturnes que s'organizen de manèra periodica ath long dera sason.
