Aran SBK: Hestivau de ritmes caribenhs ena Val d'Aran
Eth petit pòble de Garòs, en Terçon d'Arties e Garòs en municipi deth Naut Aran, celèbre aguesta dimenjada era hèsta en aunor a Sant Julià, mès, dempús der an passat tanben acuelh er ARAN SBK festival.
Es ritmes sensuaus com era salsa cubana, era bachata dominicana e era kizomba, un balh arraïtzat enes païsi de parla portuguesa, son es protagonistes d'aguest hestivau que arribe ena dusau edicion entot promocionar es ritmes caribenhs ena Val d'Aran.
Javi Barbosa, aficionat ath balh de tostemp, siguec eth creador de Balharan, un grop de entosiates d'Aran e dera Ribagorça que s'amassen lèu cada setmana tà practicar es balhs ath temps que hèn diferentes trobades e barades populars.
Ei ara en mes d'agost que organizen aguest hestivau que ena prumèra edicion amassaue mès de 300 persones arribades de diferenti punts de Catalonha.
Era celebracion dera dusau edicion der Aran SBK praticament a metut eth pannèu de complèrt ene lotjaments deth pòble que aguesti dies multiplicarà per tres era sua poblacion.
En aguesti tres díes es que s'apròpen en Garòs poderan participar enes difrenti talhèrs que s'haràn d'aguestes dances, tanben gaudiran dera gastronomia e dera musica damb eth concèrt deth grop Compota de Manana ena net de diuendres.
