Infinite Race Val d'Aran: Ua pròva de resistència e estratègia

Ena Val d'Aran, era sason de corses de montanha se barre aguest mes de seteme damb era dusau edicion dera Infinite Race Val d'Aran Backyard Ultra. 

Resistència e estratègia

Aguesta corsa neishie en 2024 dera man de 3 joeni passionadi der espòrt, Marti Alonso Florensa, Lucia Manero Garcia e Victor Fernandez Caubet, que se prepausèren de hèr ua corsa d'ultradistància diferenta. Eth format escuelhut siguec eth des Backyard Ultra, un nòm que vò dider córrer en pati deth darrèr (de casa)'.

Origens

Gary "Lazarus Lake" Cantrell, creaue aguest format en 2011 en Tennessee, Estats Units, damb era corsa 'Big Dog's Backyard Ultra' en aunor deth sòn can. Era sua propòsta ère, e atau se manten dempús des ans, un rèpte de resistència e estratègia a on es participants an de completar un circuit de 6.700 mètres. 

Cada ora comence ua naua corsa. En acabar, se quede temps, lo cau profitar tà descansar, minjar e beuer. E se non se complète eth recorregut en temps mercat, eth corredor o corredora demore eliminat.

Sonque un o ua pòt guanhar

Aguesta ei ua pròva d'eliminacion ena sonque i pòt auer un guanhador o guanhadora. Serà aquera persona que complète un torn mès qu'era rèsta. Mès se arrés ac hè, era corsa acabe sense goanhador o guanhadora.

Eth recorregut dera Backyard Ultra aranesa ei exigent damb 230mts de desnivèu positiu en cada torn, mès eth circuit tanben mos permet gaudir des vistes entot passar per tres des pòbles deth Naut Aran: Salardú, Unha e Gessa. 

Participacion populara 

Era organizacion vò que era Infinite Race Val d'Aran sigue tanben un punt de trobada de toti es aficionadi, grani e petiti e entad acrò an organizat ua corsa populara tad aqueri que volguen hèr eth recorregut en familha o damb es amics. 

Mès de 23 torns

Eth basc Aritz Vázquez, que completaue 23 torns entot hèr 154kms, siguec eth guanhador dera prumèra edicion. Eth milhor aranés que siguec Quique Quintero que s'arturaue dempús de 18 ores de corsa.

Era Infinte Race val d'Aran hè part deth circuit catalan e espanhòl des Backyards Ultra e enguan ei 'Silver ticket', açò vò dider que eth guanhador artenherà un lòc dirècte en equip espanhòl que participarà en Campeonat Mondiau per Equips de Backyard Ultra 2026. 

Auram a quauquarrés que hèsque 24 torns?