Condemnen ua promotora a isolar acosticament un blòc en Tredòs

Era promotora d'un blòc de pisi de Tredòs, en Naut Aran, aurà de pagar es òbres entà insonoritzar es abitatges dera bastissa. Era Audiéncia de Lhèida a condemnat era enterpresa dempús qu'es proprietaris agen demostrat que pòden sénter convèrses, còps o passi des vesins.

Un patac ena paret d'ua cramba se podie enténer perfèctaments des deth minjador deth costat. Encara mès, se podien escotar convèrses entre dues persones plaçades der aute costat dera paret, e tanben es passi d'ua persona que baishaue pes escales der abitatge vesin. Açò ei çò que constate un informe pericial qu'a estat clau en aguest cas.

Era comunitat de proprietaris auie començat a reclamar ara promotora pes problèmes de insonorizacion pòc dempús de constituïr-se, en 2015. En ua junta celebrada en seteme deth 2016, diuèrsi vesins denoncièren es "grèus problèmes d'insonorització". Er an següent, era comunitat tornèc a abordar eth problèma e deishèc constància qu'en bèri abitatges era manca d'isolament empedie mantier ues minimes condicions de privadesa.

Ua enterpresa especializada efectuèc pròves acostiques e comprovèc que sonque dus pisi complien eth nivèu minim establit pera nòrma aplicabla, deth temps que quate no lo complien e es tres restants non permetien arribar en ua conclusion definitiva.

Era senténcia considère provat qu'es pisi presenten ua fauta de confòrt acostic qu'afècte ara abitabilitat e tanben era mantenença d'ues condicions minimes de privadesa.

Era senténcia obligue ara promotora a assumir er impòrt des òbres entà arténher es 46 decibèls d'isolament acostic previst en projècte d'òbra.

Segontes cònste ena resolucion, er impòrt concrèt dera indemnizacion se fixarà ena fasa d'execucion dera senténcia, dempús d'ua naua avaloracion judiciau.