Manga Km0 ena Bibliotèca de Vielha, autors de proximitat e influència globau

Era exposicion itineranta 'Manga Km0: autors de proximitat', que se pòt veir encara ena Bibliotèca Generau de Vielha enquiath 15 d'Abriu, non ei sonque ua mòstra entà veir còmic, mès que tanben ei ua oportunitat entà crear.

Atau ac poderen comprobar es alumnes de 5au e 6au dera escòla Alejandro Casona de Les damb eth talhèr que les hèc Alejandro Merino Ortega, a on poderen descobrir de prumèra man coma se bastís un personatge o ua istòria.

Eth comic de casa nòsta non ei ua causa recenta. Qui non a liejut eth TBO, creat en 1917 e que més tard inclodiren es istòries de Mortadelo e Filemon, Zipi Zape, La Familia Ulises...

D'auti dilhèu s'an iniciat damb es aventures d'Asterix o Tintin o es comics de Spiderman, La patrulla X, Conan, Superman o Batman.

Tanben auem comic japonés coneishut coma manga, es prumères adaptacion mos arribauen en format series anime de tv en castelhan, Heidi, Marco, Mazinger Z, e mès tard en catalan damb Bola de drac, Doctor Slump, e molti d'auti.

Era naua generacion d'autors ja non entén de frontères. Bèu deth manga japonés, deth còmic europèu o american e tanben dera illustracion digitau, e damb açò bastís un lenguatge pròpri.

Alejandro Merino ei un bon exemple d'aguest perfil: un artista multidisciplinari que trabalhe entre eth diboish, eth guion e eth concept art, e que represente ua hornada de creadors que non se limiten ath papèr, mès qu'explòren tanben d'auti encastres visuaus, coma eth dessenh o eth mon des videojòcs.
Eth sòn estil, fòrça mercat pera influéncia deth manga, connècte damb ua manèra d'explicar istòries mès dinamica e visuau.

Un des darrèri trabalhs d'Alejandro Merino a estat era biografia en còmic de Joaquin Sabina

Era exposcion "Manga Km0", da votz a creadors locaus e explique un fenomèn mès gran: com eth manga a deishat d'èster un estil luenhan entà convertir-se en un lenguatge globau que tanben se cree des d'ací.

Se vos atré aguest mon, deth 15 ath 17 de mai ena Fira Barcelona de Montjuïc se harà era 44 edicion de 'Comic Barcelona'