Er Institut Catalan d'Ornitologia hè un seguiment d'audèths enes patis escolars
D'un temps ençà er Institut Catalan d'Ornitologia s'a prepausat de hèr a conéisher era biodiversitat d'audèths que se pòden veir enes patis des escòles e en sòn entorn e her-ne un seguiment tà identificar es diferentes espècies d'audèths e atau incorporar es donades que s'artenhen en ua plataforma de ciència ciutadana que se ditz Ocells dels jardins
Marina Cuito ei tècnica de comunicacion en ICO e era responsable dera organizacion des diferenti corsi que organize er institut mès tanben coordine diferenti projèctes de ciencia ciutadana dedicadi as Aurongles as Audèths des Jardins e Nins.
Licenciada en Publicitat e Relacions Publiques e ua apasionada dera musica, gràcies a era auem pogut escotar en aranés adaptacions de classics de disney, era aficion pes audèths ven de loenh:
Siguec un viatge entath Delta quan èra petita que me desvelhèc era coriositat pera ornitologia. Escotar-les cantar e poder-les observar ei un gòi
Cuito explique que cau pòga causa tà poder observar es aus, bona oïda e un prismatics e tanben ua guida des audèths deth nòste entorn.
Cens d'audèths
Ath long der an se hèn dus censi d'audèths ath laguens deth projècte Audèths des jardins. Un en iuèrn, er aute ena primauèra. Ena darrèra dimenjada de gèr se hèc eth cens d'iuèrn de 2026 e com ja passèc estan passat, es centres educatius de Catalonha tanben an participat en projècte.
"Audèths de jardin" un projècte der ICO tà conéisher era biodiversitat en entorn escolar
Enguan s'an recebut donades de 76 municipis de Catalonha, damb un total de 164 censi e damb es donades remassades, s'a hèt un mapa damb era localizacion de toti es jardins que i an participat. Entre eth 19 e eth 25 de gèr de 2026 se detectèren 64 espècies enes jardins que participen en projècte. Era espècie més observada que siguec eth passerat, parrat o passeron, present en 117 censi, seguit deth piech ròi (90), era tortora o tortorèla turca (86), era agaça o piga (83) e era parra limadera, capnere o merlenguina, damb (81).
En cens de primauèra, que s'harà a finaus de mai, poderam ahiger d'auti audèths. Des que se pòden veir ena Val d'Aran trobam es aurongles, ua espècie protegida, eth gai, era torda o mèrla, es tornelhs o era cardalina. Mès ena Val d'Aran n'auem un que sonque se pòt veir enes cassenhaus de Quate lòcs, ei eth pic mejan (dendrocoptes medius).
Era Associacion Aran pera Natura publicaue temps en darrèr eth libre 'Audèths dera Val d'Aran' damb eth que podem conéisher bères ues des mès de 200 espècies que viuen en territòri ath long der an, entre es que conviuen audèths residents, migratòris e d'auti visitaires ocasionaus que trauèssen eth cèu aranés en sòn recorrut entre eth nòrd e eth sud deth continent.
