Les consolide era sua aufèrta formativa en encastre sociosanitari damb un nau cicle
Er Institut d'Ostaleria de Les consolidarà era sua aufèrta formativa en encastre sanitari damb un nau cicle de Formacion Professionau dedicat ara Atencion de Persones en Situacion de Dependéncia. Començarà aguest cors 2026-2027 damb lèu totes es places plees.
Aguest ei eth dusau cicle en encastre sanitari que s'impartirà ena Val d'Aran, dempús qu'est an passat s'implantèsse eth de Suenhs Auxiliars d'Infermeria. Toti dus se corsaràn en Institut de Ostalaria de Les, que pòga pòc, daurís eth sòn ventalh d'estudis damb er objectiu de devier un centre de referéncia ena formacion professionau en casa nòsta.
Les amplie era sua aufèrta formativa damb un nau cicle
Segontes Carlota Valls, directora territoriau d'Educacion en Naut Pirenèu e Aran, damb aguest nau cicle de grad mejan d'Atencion a Persones en Situacion de Dependéncia:
se vò professionalitzar un trabalh soent pòc arreconeishut e que tan plan de persones exercissen sense cap de titulacion
Eth govèrn d'Aran prevé daurir enes pròplèus mesi era residéncia e centre de dia de Les. Per açò aguest cicle se ve coma ua grana oportunitat entà entrar rapidaments en mercat laborau: "Volem retier talent, qu'era gent que demore ací age era aufèrta suficenta entà non auer de marchar", soslinhe Valls.
Eth nau cicle a ua durada de 2.000 ores, que se distribusissen en dus corsi e s'impartís en format presenciau e en modalitat d'FP Dual. Capacite ar alumnat entà aufrir atencion e supòrt a persones en situacion de dependéncia autant en encastre domiciliari coma institucionau. Aguest perfil professionau a ua nauta insercion laborau, mès que mès, enes encastres datencion sociosanitària, assisténcia domiciliària e es servicis de teleassisténcia.
