Sandra González, prèmi ara milhor tèsi doctorau enes Ap!Lleida 2026
Eth passat 9 d'abriu era Reina Letizia presidie ena Seu Vella de Lhèida er autrejament des prèmis Ap!Lleida 2026 organizadi pera Associacion Professionau d'Empresàries Ap! de Llhèida.
Aguest que siguec un acte a on era Val d'Ara auec un protagonisme especiau, pr'amor que era directora deth Centre de Recorsi Pedagogics dera Val d'Aran, Sandra González Mingot, siguec guerdonada damb eth prèmi ath milhor trebalh de recèrca o tèsi doctorau.
Sandra González, ei doctora en Tecnologia Educativa e licenciada en Magisteri, Periodisme e Publicitat pera Universitat Rovira e Virgili e ei autora dera tèsi "l'Impacte de les plataformes digitals a l'educació primària catalana". Un guerdon que li arribèc per suspresa:
Non m'ac demoraua bric, perqué non m'i presentè. Sò plan aunorada e contenta, per aguest reconeishement ar esfòrç e trabalh pendent aguesti ans
En totau, 7 hemnes sigueren guardonades damb eth Madonna Mundi, ua figura que represente era guardada femenina deuant deth món.
Ua guardada critica
Era tèsi premiada de Sandra González siguec presentada ena tardor de 2024 e preten aportar ua guardada critica sus era digitalizacion dera educacion, damb plataformes com Moodle o Google Clasroom que preneren protagonisme, sustot, a compdar des confinaments pera pandèmia dera COVID-19.
"Era digitalizacion mos venguec dada sustot a compdar dera pandèmia, ua situacion d'emergéncia qu'auie de besonh solucions immediates. En aqueth moment non se pensèc enes efèctes que generarie", explique era autora.
Un guerdon damb accent aranés enes prèmis Ap!Lleida
Eth trabalh analize era preséncia d'aguestes plataformes digitaus ena educacion primària, es influéncies e eth sòn impacte, segontes era perspectiva deth professorat, en contèxte catalan: "ei ua guardada critica en aguest procés tan normalizat e ath madeish temps tan invisibilizat, sustot ena educacion primària", ahig.
Ath delà, er estudi mòstre qu'es plataformes digitaus an agut tanben un impacte sus era etica pedagogica, sociau, economica e ambientau ena educacion catalana.
