Explosion d'art murau en Aran
Jos eth nòm d'ARTMONIOM, diuèrsi artistes d'art murau s'an amassat en Aran. Ua trobada qu' auie com objectiu apropar aguesta disciplina ara ciutadania. Entad aquerò s'an amiat a tèrme diuèrses accions.
Atau, en collaboracion damb es escòles , er artista d' Ivars d'Urgell, Swen Schmitz , SWEN , a estat eth responsable de cocrear, coordinar e dirigir es activitats damb es mainatges.
È hèt propòstes de vincular era flòra e era fauna a trauèrs des muraus, sustot entà coneisher-les, perque tot soent, aquiu a on viuem, non coneishem pro , çò qu' auem ath nòste entorn
En Salardú, en ua part deth mur perimetrau dera piscina, es alumnes dera escòla Ruda , premaniren era base deth murau, que represente un bòsc .
Es arbes, s'intègren damb era vegetacion que creish dessús dera paret e Swen s'a encuedat der acabat finau damb era pintura d' audèths e animalons pròpis d'aguest abitat.
Damb ua tecnica mès desconeishuda, es rotuladors de tinta , era mainadèra d' Arties an reproduit enes hiestraus dera sala polivalenta, elements relacionadi damb er aigua. Es colors blu e iranja son es predominants
I son representadi es dus arrius, Valarties e Garona e diferenti fragments de paisatges: ròques , prats, montanhes e un shinhau de cèu
Ena escòla Castèthleon d' Es Bòrdes ,s'a representat ua escena de natura, damb audèths e vegetacion pròpies dera Val d'Aran.
E eth pati interior dera Escòla Garona, s'a convertit en ua gran estudi de pintors. Es alumnes, es mès joeni, an deishat volar era sua imaginacion entà pintar diferenti elements relacionadi damb era natura e er entorn.
Ath cant es artistes consolidadi en art urban e murau, an trebalhat ath madeish temps, en tot mostrar tecniques ben diferentes. Pincèus, aerosòls o sprais e tanben pega e papèr entà hèr collages , an convertit es grani murs de hormigon, en muraus plei de colors.
Era crida de Artmoniom , a agut molt bona acuelhuda , a metut en contacte artistes e muralistes de diferentes procedéncies en tot fomentar eth trebalh comunitari.
Es tematiques escuelhudes, ben diuèrses , damb elements adreçadi tanben ath public infantil, com era òbra des artistes Judit Sanmartí , DIDI , e Ariadna Verdugo, ARIITA , qu' an representat ua ninfa urbana, damb colors de tonalitats verdes e blues, que rebrembem er aigua e era natura
Er unic artista de casa qu' a participat en aguest eveniment ei Guilhèm Berini. Eth a un registre fòrça ampli:,figuracion, realisme, paisatges... totun enes grani formats era sua òbra ei fòrça reconeishible: eth color vermelh ei eth que predomine, e pinte tot soent estèles e holets e lèu tostemp , bèra frase reivindicativa.
M'a agradat aprofitar aguesta oportunitat. Ja qu' èm ací, entà hèr un shinhau de patriotisme, deféner era lengua, deféner er aranés, e sustot deféner era cultura
Mès er Hestau Artmoniom tanben a gessut en carrèr. En aguest cas damb un murau en ua granja que s'a integrat completament en paisatge. Oelhes, mardans, e anhèths corbissen lèu totes es parets. Eth lop non ei guaire luenh....
Es activitats s'an completat damb documentaus, taules redones e mappings en viu , com eth que se se hec en Barratge d'Aiguamòg, de lum inmersiua enes arbes. Un amas d'art e natura, entà méter fin ara prumèra edicion der hestivau, que auie com objectiu amassar muralisme, educacion e territòri.
