Un mòrt en incendi d'ua bastissa en Vielha
Un òme mòrt e un aute herit en incendi d'ua bastissa en centre de Vielha ena maitiada d'aguest deluns. Es vesins d'ua viuenda de 9 pisi an estat deslotjadi e er Ajuntament a decretat un dia de dòl oficiau.
Eth huec, que s'a declarat ath torn des 6 deth maitin, a cremat completament 6 des pisi d'aguesta bastissa plaçada en carrèr Anglada e tres mès an demorat afectadi pera aigua dera extincion. Tanben a demorat afectat eth losat d'un otèl propèr.
Er òme mòrt a estat localizat laguens d'un des estatges cremats. Es Pompièrs placen era origina deth huec ena part nauta dera bastissa, mès seràn es Mossos d'Esquadra es que n'investigaràn es causes.
Er òme herit a estat rescatat damb un camion auto-escala deth tet dera bastissa e trasladat tar Espitau d'Aran, a on a arrecebut er alta aguest madeish deluns tath meddia.
Es Servicis Sociaus deth Conselh Generau amassa damb er Ajuntament an trebalhat entà relotjar toti es vesins afectadi. Fin finau, seràn 7 es vesins qu'aguest deluns dormiràn en un otèl. Es Servicis Sociaus, ath delà, proporcionaràn tota era intendéncia de besonh as familhes afectades.
Er Ajuntament a decretat un dia de dòl oficiau qu'acabarà aguest dimars tàs 12 deth meddia. Moment en qué s'a convocat ua menuta de silenci deuant madeish der Ajuntament. Se da era circonstància qu'er òme qu'a perdut era vida auie estat trebalhador deth consistòri.
En extincion deth huec i participèren ua vintea de dotacions des Pompièrs d'Aran e 5 dotacions des Bombers dera Generalitat arribadi de Pont de Suert.
