Vielha vò esterilizar lèu era totalitat des sòns gats de carrèr en 2 ans
Er Ajuntament de Vielha e Mijaran a trauèrs deth nau Programa municipau de Gestion de Colònies Felines, meterà limits as gats de carrèr e se prepause esterilizar enes pròplèus 2 ans lèu eth 100% des felins deth municipi. Actuauments, en cap-lòc aranés e enes sòns pòbles i a mès de 700 gats e ua quarantea de colònies.
Eth consistòri a destinat enes darrèri ans ua mejana de 6.000 èuros annaus ath contraròtle des colònies felines. Ei un trabalh que se realize gràcies ara ajuda de volontaris. A compdar d'ara, eth consistòri contractarà un servici especializat e i destinarà, enguan, lèu 15.000 èuros ena prumèra campanha intersiva CER (Captura, Esterilizacion e Retorn). Açò permeterà esterilizar ua ueitantea de gats.
Totun, er objectiu der Ajuntament entath 2027 va mès enlà e a ja a demanat ua subvencion estatau de 80.000 èuros que, en cas d'èster concedida, permeterie actuar pendent 2027 aumens 632, exemplars, era practica totalitat des gats de carrèr, coma afirme Alberto López, tinent de baile:
auem de trabalhar en ua esterilizacion intensiva. En 2027 poiríem abarcar era poblacion totau
Ath delà, tanben se vò arrengar era quarantea de colònies felines deth municipi: "Volem cercar un tipe de modèl colònia que se pogue replicar en totes es qu'auem en municipi e que agen era sua caseta, eth sòn espaci de minjar e de aigua", ahig López.
Pròplèument er Ajuntament de Vielha e Mijaran daurirà un registre entà conéisher e escotar as persones que dejà suenhen o hèn eth seguiment des colònies. Dempús, se convocarà ua amassada entà premanir coordinar amassa es accions a seguir.
"Sabem que fòrça persones pòrten ans en tot realizar un esfòrç enòrme e que, en escasences, s'an sentut soletes e sense sufisents mejans. Volem reconéisher eth sòn trabalh e bastir ua gestion damb mès recorsi, coordinacion e contunhitat municipau", soslinhe eth baile de Vielha e Mijaran, Juan Antonio Serrano.
