Comencen es òbres entà estabilizar era C-28 en Pòrt dera Bonaigua
Eth Departament de Territòri a començat es òbres d'emergéncia entà estabilizar eth tram dera C-28 afectat per un important movement de tèrres en Pòrt dera Bonaigua. Es trabalhs, fòrça complèxi tecnicament, auràn ua durada aproximada d'un an e an coma objectiu garantir era seguretat dera via e mantier era circulacion dubèrta, encara que damb pas alternatiu.
Era actuacion consistís principaument en "recóser" eth terren mejançant era insercion de pilons encastradi en substrat rocós, amassa damb ormigon armat, entà reforçar era estructura dera carretèra. Es trabalhs se concentren en quilomètre 43, a on eth passat mès de hereuèr un esbauç de tèrra s'emportèc un mur de contencion e posteriorament se dauric un horat ena via. Coma explique eth director generau d'Infraestructures e Mobilitat, Ramon Ramírez,
I a un movement prigond e de caracter istoric ena montanha. Damb aguesti pilons sajam de contier-lo e redusi-lo
Per aquerò, era Generalitat trabalhe conjuntament damb era Universitat Politècnica de Catalunya entà monitorizar de forma permanenta era evolucion dera montanha e conéisher-ne eth sòn comportament.
Eth secretari de Mobilitat e Infraestructures, Manel Nadal, a explicat qu'era prioritat dera Generalitat ei mantier eth trànsit dubèrt en Pòrt dera Bonaigua pendent era durada des òbres, en tot garantir era seguretat des usatgèrs e assegurar era connectivitat entre era Val d'Aran e eth Palhars. Totun, tanben s'estudien solucions a long termini: "contunharam en tot estudiar eth tunèl dera Bonaigua. Haram un estudi prèvi. Ei ua actuacion plan cara e contondenta, mès non la podem descartar, perqué volem garantir ua comunicacion per aguesta via damb totau seguretat", assegure.
Es òbres s'executen damb caractèr d'urgéncia e compden damb un pressupòst que supère es 8 milions d'euros. Era prumèra fasa se desvoloparà pendent aguest ostiu, mentre qu'era dusau e darrèra s'executarà er ostiu que ven.
Enquia qu'es trabalhs non siguen finalizadi, era circulacion se mantierà regulada per miei d'un unic carril damb pas alternatiu.
Cau rebrembar qu'eth problèma arribèc era net deth 25 de hereuèr passat, quan un esbauçament de tèrra s'emportèc un mur de contencion. Era C-28 demorèc barrada cinc dies e se tornèc a daurir eth 2 de març damb un unic carril regulat. Pògues semanes dempús, en mes de mai, se dauric un gran horat ena madeisha carretèra, çò que confirmèc era gravetat dera inestabilitat deth terren.
